India vs Pakistan Asia Cup 2023 Super Four KL Rahul 6th Century in ODI Cricket:

आशिया चषकात २०२३ स्पर्धेच्या सुपर फोर फेरीतील भारत विरुद्ध पाकिस्तान संघातील सामना रविवारी सुरू झाला आहे. पण रविवारी पावसामुळे हा सामना पूर्ण न झाल्याने राखीव दिवशी सोमवारी उर्वरित सामना खेळवला जात आहे. राखीव दिवशी केएल राहुलने दणदणीत शतक ठोकले आहे.

दरम्यान केएल राहुलचा हा पुनरागमनाचा सामना आहे. केएल राहुलला आयपीएल २०२३ स्पर्धेत खेळताना दुखापत झाली होती. त्यानंतर त्याच्या मांडीवर शस्त्रक्रिया करण्यात आली. त्यातून आता तो पूर्ण सावरला असून भारतीय संघाकडून त्याने शतकासह यशस्वी पुनरागमन केले आहे.

केएल राहुलने या सामन्यात विराट कोहलीसह तिसऱ्या विकेटसाठी दीडशे धावांची भागीदारी रचली आहे. याबरोबरच त्याने 100 चेंडूत 10 चौकार आणि 2 षटकारांसह त्याचे शतक पूर्ण केले. हे त्याचे वनडेतील सहावे शतक ठरले आहे. तसेच आंतरराष्ट्रीय क्रिकेटमधील १५ वे शतक ठरले आहे.

केएल राहुलने या शतकासह त्याच्या टीकाकांरानांही चोख प्रत्युत्तर दिले आहे. कारण गेल्या दीड वर्षापासून तो त्याच्या कामिगिरीत सातत्य राखण्यासाठी संघर्ष करत होता.

केएल राहुलने त्याचे अखेरचे शतक डिसेंबर २०२१ मध्ये केले होते. हे शतक त्याने दक्षिण आफ्रिकेविरुद्ध सेंच्युरियन येथे झालेल्या कसोटीत केले होते. तसेच त्याने वनडेत अखेरचे शतक मार्च 2021 मध्ये पुण्यात इंग्लंडविरुद्धच्या सामन्यात केले होते.

दरम्यान, पाकिस्तानविरुद्ध भारताकडून रोहित शर्मा आणि शुभमन गिलले अर्धशतके झळकावत चांगली सुरुवात केलेली. रोहितने 56 आणि गिलने 58 धावांची खेळी केली होती. हे दोघे बाद झाल्यानंतर विराट आणि केएल राहुलने भारताचा डाव सांभाळताना धावसंख्या 300 च्या पार नेली.