IND Vs ENG: धरमशाला कसोटीपूर्वी टीम इंडियात बदल, बुमराह संघात परतला; अष्टपैलू खेळाडूला केलं रिलीज
India Test Team Squad Update 5th Test:
भारत आणि इंग्लंड यांच्यात 7 मार्चपासून धरमशाला येथे पाचवा आणि शेवटचा कसोटी सामना खेळवला जाणार आहे. मात्र, पाचव्या कसोटीपूर्वी भारतीय संघात दोन बदल पाहायला मिळाले आहेत. वास्तविक, केएल राहुलला शेवटच्या कसोटीतूनही रिलीज करण्यात आले आहे. तर जसप्रीत बुमराह संघात परतला आहे. याशिवाय, स्टार अष्टपैलू खेळाडू वॉशिंग्टन सुंदरलाही पाचव्या कसोटीतून रिलीज करण्यात आले आहे.
दरम्यान, या मालिकेतील दुसऱ्या कसोटीसाठी संघात वॉशिंग्टन सुंदरचा समावेश करण्यात आला होता. पण त्याला एकही कसोटी सामना खेळण्याची संधी मिळाली नाही. 2 मार्चपासून खेळल्या जाणाऱ्या रणजी ट्रॉफी 2024 च्या सेमीफायनलमुळे वॉशिंग्टन सुंदरला रिलीज केले आहे. वास्तविक, रणजी ट्रॉफी 2024 चा उपांत्य सामना 2 मार्च रोजी मुंबई आणि तामिळनाडू यांच्यात होणार आहे. सुंदर हा तामिळनाडू संघाचा भाग आहे.
विशाखापट्टणम कसोटीसाठी संघात समावेश केला
दरम्यान, विशाखापट्टणम कसोटीत रवींद्र जडेजाच्या जागी वॉशिंग्टन सुंदरचा संघात समावेश करण्यात आला होता. पण त्याला एकही सामना खेळण्याची संधी मिळाली नाही. तथापि, वॉशिंग्टन सुंदरला सोडण्याचे कारण म्हणजे रणजी ट्रॉफी 2024 ची उपांत्य फेरी. सुंदर तामिळनाडूसाठी देशांतर्गत क्रिकेट खेळतो आणि 2 मार्च रोजी त्याच्या संघाला मुंबईविरुद्ध उपांत्य फेरीचा सामना खेळायचा आहे. त्यामुळे त्याला संघातून रिलीज करण्यात आले आहे.
बीसीसीआयने आपल्या प्रसिद्धीपत्रकात असेही म्हटले आहे की, जर टीम इंडियाला पाचव्या कसोटीत त्याची गरज भासली तर ते त्याला पुन्हा संघात समाविष्ट करु शकतात. सुंदरचे तामिळनाडू संघात पुनरागमन झाल्याने त्याच्या संघाला अधिक बळ मिळेल. सुंदर हा ऑफ स्पिनसोबत मधल्या फळीतील फलंदाजही आहे.
बुमराह संघात परतला
टीम इंडियाचा कसोटी उपकर्णधार जसप्रीत बुमराहचे पुन्हा एकदा संघात पुनरागमन झाले आहे. वास्तविक, जसप्रीत बुमराहला रांची कसोटीत विश्रांती देण्यात आली होती. आता पुन्हा एकदा जसप्रीत बुमराह धरमशाला कसोटीत भारतीय वेगवान गोलंदाजीच्या डिपार्टमेंटचे नेतृत्व करताना दिसणार आहे.
बुमराह हा कसोटी मालिकेत सर्वाधिक बळी घेणारा दुसरा गोलंदाज आहे. त्याने आतापर्यंत 4 कसोटीत 17 बळी घेतले आहेत. इंग्लंडचा (England) फिरकी गोलंदाज टॉम हार्टले 20 विकेट्ससह अव्वल स्थानावर आहे. धरमशाला कसोटीत बुमराह पुन्हा एकदा आपल्या गोलंदाजीने इंग्लंडच्या फलंदाजांना गारद करताना दिसणार आहे.
भारताने मालिका जिंकली
दरम्यान, रांची कसोटी जिंकल्यानंतर भारतीय संघाने मालिकेवर कब्जा केला आहे. टीम इंडियाने (Team India) पाच कसोटी सामन्यांच्या मालिकेत 3-1 अशी अजिंक्य आघाडी कायम ठेवली आहे. आता पाचवी कसोटी जिंकून मालिका 4-1 ने जिंकण्याचे कर्णधार रोहित शर्माचे लक्ष्य असेल. हैदराबाद कसोटीतील पराभवानंतर टीम इंडियाने शानदार पुनरागमन केले आहे. ICC वर्ल्ड टेस्ट चॅम्पियनशिप 2023-25 साठी धरमशाला टेस्ट देखील खूप महत्वाची मानली जाते.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.