India vs Australia 3rd ODI: भारत विरुद्ध ऑस्ट्रेलिया संघात बुधवारी (22 मार्च) तिसरा वनडे सामना खेळवला जाणार आहे. हा सामना चेन्नईमधील एमए चिदंबरम म्हणजेच चेपॉक स्टेडियममध्ये खेळवला जाणार आहे. भारतीय प्रमाणवेळेनुसार या सामन्याला दुपारी 1.30 वाजता सुरुवात होईल.

दरम्यान, सध्या भारतात अवकाळी पाऊस कोसळताना दिसत आहे, त्याचा परिणार या सामन्यावर पण होणार का असा प्रश्न अनेक क्रिकेट चाहत्यांना पडला आहे.

गेल्या काही दिवसात चेन्नईतही पाऊस झाला आहे. त्यामुळे तिसऱ्या वनडेवरही पावसाचे संकट आहे. तरी हवामान अंदाजानुसार दिवसा 33 डिग्री सेल्सियसच्या आसपास तापमान राहिल. तसेच दिवसभर बहुतेक सूर्यप्रकाश असेल.

पण तरी चेन्नईतील काही भागात पावसाच्या सरी कोसळण्याचीही शक्यता आहे. त्याचबरोबर संध्याकाळी मात्र आकाश निरभ्र राहणार असून पावसाची शक्यता नाही. त्यामुळे या सामन्यात फार मोठा पावसाचा अडथळा येण्याची शक्यता कमी आहे.

निर्णायक सामना

चेन्नईत होणारा तिसरा वनडे सामना निर्णायक ठरणार आहे. कारण तीन सामन्यांच्या वनडे मालिकेतील मुंबईला झालेला पहिला वनडे सामना भारताने जिंकला होता. तर विशाखापट्टणमला झालेला दुसरा वनडे सामना ऑस्ट्रेलियाने जिंकला होता. त्यामुळे सध्या दोन सामन्यांनंतर मालिकेत 1-1 अशी बरोबरी झालेली आहे.

त्याचमुळे तिसरा सामना निर्णायक ठरणार आहे. या सामन्यात जो संघ जिंकेल, तो संघ ही मालिकाही जिंकणार आहे. ही मालिका यावर्षी भारतात ऑक्टोबर-नोव्हेंबर दरम्यान होणाऱ्या वनडे वर्ल्डकपच्या दृष्टीनेही महत्त्वाची आहे. तसेच आयपीएल 2023 पूर्वी होणारी भारताची ही अखेरची आंतरराष्ट्रीय मालिका आहे.

भारतीय संघात बदलाची शक्यता कमी

दरम्यान, तिसऱ्या वनडे सामन्यासाठी भारताच्या प्लेइंग इलेव्हनमध्ये बदल होण्याची शक्यता कमी आहे. दुसऱ्या सामन्यात खेळलेला संघच तिसऱ्या सामन्यातही खेळताना दिसू शकतो.

यातून निवडली जाईल भारताची प्लेइंग इलेव्हन -

रोहित शर्मा (कर्णधार), केएल राहुल (यष्टीरक्षक), शुभमन गिल, विराट कोहली, सूर्यकुमार यादव, हार्दिक पंड्या, रवींद्र जडेजा, अक्षर पटेल, कुलदीप यादव, मोहम्मद शमी, मोहम्मद सिराज, जयदेव उनाडकट, युझवेंद्र चहल, शार्दुल ठाकूर, ईशान किशन, वॉशिंग्टन सुंदर, उमरान मलिक