वनडे वर्ल्डकप 2023 स्पर्धेतील पाचवा सामना रविवारी भारत विरुद्ध ऑस्ट्रेलिया संघात होत आहे. चेन्नईतील एमए चिदंबरम स्टेडियमवर होत असलेल्या या सामन्यात ऑस्ट्रेलियाने भारतासमोर 200 धावांचे आव्हान ठेवले आहे.

या सामन्यात ऑस्ट्रेलियाने नाणेफेक जिंकून प्रथम फलंदाजी करण्याचा निर्णय घेतला होता. त्यानुसार ऑस्ट्रेलियाने प्रथम फलंदाजी केली, पण त्यांचा संघ 49.3 षटकात 199 धावांवर सर्वबाद झाला. भारताकडून रविंद्र जडेजाने 3 विकेट्स घेतल्या, तर कुलदीप यादवने 2 विकेट्स घेतल्या.

ऑस्ट्रेलियाकडून सलामीला डेव्हिड वॉर्नर आणि मिचेल मार्श उतरले होते. मात्र, त्यांची सुरुवात फारशी चांगली झाली नाही. मार्श तिसऱ्या षटकात जसप्रीत बुमराहच्या चेंडूवर विराट कोहलीकडे झेल देत शुन्यावर बाद झाला. परंतु, त्यानंतर वॉर्नरला स्टीव्ह स्मिथने चांगली साथ दिली. या दोघांनी अर्धशतकी भागीदारी करत ऑस्ट्रेलियाचा डाव सावरला.

मात्र, त्यांची भागीदारी रंगत असतानाच कुलदीप यादवने 17 व्या षटकात स्वत:च्याच गोलंदाजीवर वॉर्नरला झेल घेतला. वॉर्नर 52 चेंडूत 41 धावा करून बाद झाला. यानंतर स्मिथला साथ देण्यासाठी मार्नस लॅब्युशेन आला होता. त्यांनी दोघांनी ऑस्ट्रेलियाला 100 धावांचा टप्पा पार करून दिला.

मात्र, त्यांची जोडी अधिक धोकादायक ठरण्यापूर्वीच रविंद्र जडेजाने आपल्या फिरकीचे जाळे टाकले. त्याने 28 व्या षटकात स्मिथला त्रिफळाचीत केले, तर 30 व्या षटकात लॅब्युशेन आणि ऍलेक्स कॅरेला माघारी धाडले. स्मिथने 71 चेंडूत 46 धावा केल्या. लॅब्युशेन 27 धावांवर बाद झाल, तर कॅरेला भोपळाही फोडता आला नाही.

यानंतर ग्लेन मॅक्सवेल आणि कॅमेरॉन ग्रीन यांनी डाव सावरण्याचा प्रयत्न केला. पण मॅक्सवेलचा अडथळा 36 व्या षटकात कुलदीप यादवने दूर केला. त्याने मॅक्सवेलला 15 धावांवर त्रिफळाचीत केले. त्याच्या पुढच्याच षटकात ग्रीनला आर अश्विनने 8 धावांवर माघारी धाडले.

परंतु, त्यांनंतर कर्णधार पॅट कमिन्स आणि मिचेल स्टार्कने चिवट झुंज दिली. यावेळी झम्पानेही 20 चेंडू खेळत 6 धावा केल्या. त्यामुळे ऑस्ट्रेलियाला 200 धावांचे आव्हान ठेवण्यात यश आले. कमिन्सने 15 धावा केल्या, तर स्टार्कने 28 धावा केल्या.

भारताकडून जडेजा आणि कुलदीप यांच्याव्यतिरिक्त जसप्रीत बुमराहने 2 विकेट्स घेतल्या. तसेच मोहम्मद सिराज, हार्दिक पंड्या आणि आर अश्विन यांनी प्रत्येकी 1 विकेट घेतली.