Indian Hockey Team beat Pakistan 4-0 in Asian Champions Trophy Chennai 2023:

आशिया चॅम्पियन्स ट्रॉफी 2023 स्पर्धेत भारतीय हॉकी संघाने बुधवारी (9 ऑगस्ट) पाकिस्तान हॉकी संघाला पराभूत केले. हा या स्पर्धेतील अखेरचा साखळी सामना होता. त्यामुळे भारताने साखळी फेरीत अपराजित राहात गुणतालिकेत अव्वल क्रमांक कायम ठेवला आणि उपांत्य फेरीतही दणक्यात प्रवेश केला आहे.

चेन्नईमधील मेयर राधाकृष्णन हॉकी स्टेडियमवर झालेल्या या सामन्यात भारताने 4-0 फरकाने पाकिस्तानविरुद्ध विजय मिळवला. भारताकडून कर्णधार हरमनप्रीत सिंगने शानदार कामगिरी बजावली. भारतासाठी हरमनप्रीतने 2 गोल नोंदवले, तर जुगराज सिंग आणि आकाशदीप सिंग यांनी प्रत्येकी 1 गोल केला.

भारताचा आता उपांत्य फेरीतील सामना जपानविरुद्ध 11 ऑगस्टला भारतीय प्रमाणवेळेनुसार रात्री 8.30 वाजता सुरू होईल. यापूर्वी भारताला जपानविरुद्ध साखळी फेरीत 1-1 अशा बरोबरीवर समाधान मानावे लागले होते.

पाकिस्तानचे स्वप्न भंगले

दरम्यान, भारताविरुद्धच्या साखळी सामन्यात पाकिस्तानला मोठ्या पराभवाला सामोरे जावे लागल्याने त्यांचे उपांत्य फेरीत जाण्याचे स्वप्न भंगले आहे.

पाकिस्तान गुणतालिकेत पाचव्या क्रमांकावर राहिले. त्यामुळे आता पाकिस्तानला सहाव्या क्रमांकावर राहिलेल्या चीन संघाविरुद्ध 11 ऑगस्ट रोजी सामना खेळायचा आहे. यातून अंतिम 5 वे आणि 6 वे स्थान निश्चित होईल.