भारत विरुद्ध इंग्लंड संघात कसोटी मालिकेतील पाचवा आणि अखेरचा सामना धरमशाला येथे होत आहे. या सामन्यात भारताचा पहिला डाव सामन्याच्या तिसऱ्या दिवशी (9 मार्च) पहिल्या तासात संपला. भारताने पहिल्या डावात 124.1 षटकात सर्वबाद 477 धावा करत 259 धावांची आघाडी घेतली.
दरम्यान, त्यानंतर तिसऱ्या दिवशी क्षेत्ररक्षणावेळी भारताचा कर्णधार रोहित शर्मा मैदानात उतरला नाही. याबद्दल बीसीसीआयने माहिती दिली आहे. बीसीसीआयने दिलेल्या माहितीनुसार रोहितला पाठीत वेदना असल्याने तो तिसऱ्या दिवशी मैदानात उतरलेला नाही. दरम्यान, त्याच्याऐवजी नेतृत्वाची जबाबदारी उपकर्णधार जसप्रीत बुमराह सांभाळत आहे.
या सामन्यात भारताने तिसऱ्या दिवशी पहिल्या डावात 120 षटकापासून आणि 8 बाद 473 धावांपासून पुढे खेळायला सुरुवात केली होती. पण सुरुवातीलाच जेम्स अँडरसनने 124 व्या षटकात कुलदीप यादवला 30 धावांवर जेम्स अँडरसनने यष्टीरक्षक बेन फोक्सच्या हातून झेलबाद केले.
त्यानंतर पुढच्याच षटकात बाशीरने जसप्रीत बुमराहला 20 धावांवर बाद केले. यासह भारताचा पहिला डाव संपला.
दरम्यान, पहिल्या डावात भारताकडून रोहित शर्माने शतकी खेळी केली होती. त्याने शुभमन गिलबरोबर दुसऱ्या विकेटसाठी 271 धावांची भागीदारीही केली. गिलनेही रोहितबरोबर खेळताना शतक केले.
रोहितने 162 चेंडूत 103 धावांची खेळी केली. तसेच गिलने 150 चेंडूत 110 धावांची खेळी केली. याशिवाय सर्फराज खानने 56 धावांची खेळी केली, तसेच देवदत्त पडिक्कलने 65 धावांची खेळी केली.
इंग्लंडकडून या डावात शोएब बशीरने सर्वाधिक 5 विकेट्स घेतल्या. तसेच जेम्स अँडरसन आणि टॉम हार्टली यांनी प्रत्येकी 2 विकेट्स घेतल्या. बेन स्टोक्सने 1 विकेट घेतली.
तत्पूर्वी, इंग्लंडचा पहिला डाव 57.4 षटकात सर्वबाद 218 धावा केल्या.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.