Women's Junior Hockey Asia Cup: भारताच्या ज्युनियर महिला हॉकी संघाने इतिहास रचला आहे. या संघाने ज्युनियर महिला आशिया चषकाचे विजेतेपद पटकावले. भारताने पहिल्यांदाच या स्पर्धेवर नाव कोरले आहे.

अंतिम फेरीत टीम इंडियासमोर दक्षिण कोरियाचे आव्हान होते. भारताने स्पर्धेच्या इतिहासातील सर्वात यशस्वी संघ असलेल्या दक्षिण कोरियाचा 2-1 असा पराभव केला.

दक्षिण कोरियाने सर्वाधिक 4 वेळा ही स्पर्धा जिंकली आहे. ही स्पर्धा 2021 मध्येच होणार होती, पण कोरोनामुळे ती दोन वर्षांच्या विलंबाने खेळवली गेली.

दरम्यान, पहिल्या क्वार्टरमध्ये बरोबरीत राहिल्यानंतर भारताने 22 व्या मिनिटाला अनुच्या पेनल्टी कॉर्नरच्या गोलद्वारे आघाडी घेतली. जपानविरुद्धच्या उपांत्य फेरीतील निराशा मागे टाकत, अनुने गोलरक्षकाच्या डावीकडून गोल करत भारताला 1-0 अशी आघाडी मिळवून दिली.

मात्र, पार्क सेओ येऑनने केलेल्या गोलमुळे तीन मिनिटांनी दक्षिण कोरियाने 1-1 अशी आघाडी घेतली. 41व्या मिनिटाला दक्षिण कोरियाच्या (South Korea) गोलकीपरच्या उजव्या बाजूने डागलेला गोल निर्णायक ठरला. नीलमने भारताला 2-1 ने आघाडीवर पोहोचवले.

त्यानंतर, अखेरच्या क्वार्टरमध्ये भारतीय संघाने आपली आघाडी मजबूत ठेवत विजयाची नोंद केली. दक्षिण कोरियाला पेनल्टी कॉर्नरच्या रुपात गोल करण्याच्या अनेक संधी मिळाल्या, परंतु संघाला त्याचा फायदा उठवता आला नाही.

यापूर्वी, महिला ज्युनियर आशिया कपमध्ये भारताची (India) सर्वोत्तम कामगिरी 2012 मध्ये होती, जेव्हा संघ बँकॉकमध्ये पहिल्यांदा अंतिम फेरीत पोहोचला होता. मात्र, चीनकडून 2-5 ने पराभवाचा सामना करावा लागला होता.