WI vs IND, 2nd T20I: वेस्ट इंडिजविरुद्ध हार्दिक पांड्याच्या नेतृत्वाखाली टी-20 मालिका खेळणाऱ्या भारतीय संघाची लाजिरवाणी कामगिरी सुरुच आहे.

वेस्ट इंडिजविरुद्ध गयाना येथे खेळेल्या गेलेल्या मालिकेतील दुसऱ्या टी-20 सामन्यात टीम इंडियाला 2 विकेट्सनी पराभवाचा सामना करावा लागला.

यासह वेस्ट इंडिजने 5 सामन्यांच्या मालिकेत 2-0 अशी आघाडी घेतली आहे. प्रथम फलंदाजी करताना भारताने 7 विकेट्सच्या मोबदल्यात 152 धावा केल्या, त्यानंतर इंडिज संघाने 8 विकेट्स गमावून 155 धावा केल्या आणि 7 चेंडू राखून लक्ष्य गाठले.

दरम्यान, 153 धावांच्या लक्ष्याचा पाठलाग करताना वेस्ट इंडिज संघाने 32 धावांत पहिल्या 3 विकेट गमावल्या. ब्रेंडन किंग (0), जॉन्सन चार्ल्स (2) आणि काइल मेयर्स (15) लवकर पॅव्हेलियनमध्ये परतले.

मात्र, चौथ्या क्रमांकावर फलंदाजीसाठी आलेल्या निकोलस पूरनने संघाला सावरले. त्याने आपल्या 67 धावांच्या खेळीत 6 चौकार आणि 4 षटकार मारले. कर्णधार रोव्हमन पॉवेलने 21 तर शिमरॉन हेटमायरने 22 धावा केल्या.

मजबूत स्थितीत दिसत असलेला वेस्ट इंडिजचा संघ अखेरीस 126 आणि 129 या धावसंख्येदरम्यान 4 विकेट गमावून अडचणीत सापडला. अकील हुसेन (नाबाद 16) आणि अल्झारी जोसेफ (नाबाद 10) यांनी संघाला विजय मिळवून दिला असला तरी.

कर्णधार हार्दिक पांड्याने (Hardik Pandya) 3 तर यजुवेंद्र चहलने 2 बळी घेतले. अर्शदीप सिंग आणि मुकेश कुमार यांना 1-1 विकेट मिळाली.

दुसरीकडे, वेस्ट इंडिजविरुद्धच्या दुसऱ्या टी-20 मध्ये प्रथम फलंदाजी करताना भारतीय संघाने 20 षटकात 7 विकेट्स गमावून 152 धावा केल्या.

भारताकडून दुसरा सामना खेळताना तिलक वर्माने सर्वाधिक 51 धावांची खेळी खेळली. तर वेस्ट इंडिजकडून अकिल हुसेन, अल्झारी जोसेफ आणि रोमॅरियो शेपर्ड यांनी प्रत्येकी दोन गडी बाद केले.

पहिल्यांदा फलंदाजीसाठी उतरलेल्या भारतीय संघाची सुरुवात पुन्हा एकदा खराब झाली. संघाचा सलामीवीर शुभमन गिल 9 चेंडूत 7 धावा करुन बाद झाला. तो बाद झाल्यानंतर पुढच्याच षटकात सूर्यकुमार यादव धावबाद झाला. सूर्याला 3 चेंडूत एकच धाव करता आली.

दरम्यान, इशान किशन (Ishan Kishan) आणि तिलक वर्माने टीम इंडियाचा डाव सावरण्याचा प्रयत्न केला, पण ते संथ गतीने धावा काढताना दिसले. इशान 23 चेंडूत 27 धावा करुन क्लीन बोल्ड झाला. तर वर्मा 16 व्या षटकात अकिल हुसेनचा बळी ठरला.

दुसरीकडे, संजू सॅमसन खराब शॉट खेळून पॅव्हेलियनमध्ये परतला. त्याने अवघ्या 7 धावा काढल्या. दरम्यान, तिलक वर्माने आपले पहिले आंतरराष्ट्रीय अर्धशतक पूर्ण केले. 41 चेंडूत 51 धावा करुन तो बाद झाला.