ICC rated Cape Town Newlands pitch Unsatisfactory after South Africa vs India Test completed in two days:

दक्षिण आफ्रिका विरुद्ध भारत संघात जानेवारी 2024 च्या सुरुवातीचा कसोटी मालिकेतील दुसरा सामना केपटाऊनमधील न्युलँड्स स्टेडियमवर पार पडला होता. या सामन्यात भारताने 4 जानेवारीला दीडच दिवसात 7 विकेट्सने विजय मिळवला. या विजयासह भारताने मालिकेत बरोबरी साधली होती.

दरम्यान, हा सामना अवघ्या 107 षटकात संपला होता. त्यामुळे हा सामना कसोटी क्रिकेटच्या इतिहासातील सर्वात छोटा सामनाही ठरला होता. मात्र, या सामन्यानंतर न्युलँड्स स्टेडियमच्या खेळपट्टीबद्दल बरीच चर्चा झाली.

आता याच खेळपट्टीला आंतरराष्ट्रीय क्रिकेट परिषजेकडून रेटिंग देण्यात आले आहे. आयसीसीने या खेळपट्टीला असमाधानकारक (unsatisfactory) असे रेटिंग दिले आहे.

आयसीसी सामनाधिकारी ख्रिस ब्रॉड यांनी आपला अहवाल सादर केला, ज्यात सामना अधिकार्‍यांबद्दल चिंता व्यक्त केली गेली आणि मूल्यांकनानंतर केपटाऊनमधील न्यूलँड्सची खेळपट्टी 'असमाधानकारक' असल्याचे सांगितले. त्यांनी सांगितले की या खेळपट्टीवर फलंदाजी करणे अत्यंत अवघड होते.

दरम्यान, ज्या खेळपट्टीला असमाधानकारक असे रेटिंग दिले जाते, त्या खेळपट्टीला एक डिमिरीट पाँइट्स देण्यात येतो. त्यामुळे न्यूलँड्सच्या खेळपट्टीलाही एक डिमिरीट पाँइंट मिळाला आहे. हे पाँइंट्स 5 वर्षांच्या कालावधीपर्यंत सक्रिय असतात.

जर एखाद्या खेळपट्टीला 6 डिमिरीट पाँइंट्स मिळाले, तर 12 महिने त्यावर आंतरराष्ट्रीय क्रिकेटचे आयोजन होऊ शकत नाही. तसेच जर 12 डिमिरीट पाँइंट्स मिळाले, तर 24 महिन्यांसाठी त्या खेळपट्टीवर सामना होऊ शकत नाही.

लक्षात घेण्यासारखी गोष्ट अशी की आता दक्षिण आफ्रिका आयसीसीने न्युलँड्सच्या खेळपट्टीला दिलेल्या असमाधानकारक रेटिंगच्या विरुद्ध 14 दिवसात अपील करू शकतात.

या खेळपट्टीवर पहिल्याच दिवशी तब्बल 23 विकेट्स गेल्या होत्या. दक्षिण आफ्रिका संघ पहिल्या डावात 23.2 षटकात 55 धावांवर सर्वबाद झाला होता. तसेच भारतीय संघही पहिल्या डावात 34.5 षटकात 153 धावांवर सर्वबाद झाला होता. पण भारताने पहिल्या डावात 98 धावांची आघाडी घेतली होती.

दुसऱ्या डावात दक्षिण आफ्रिकेने 36.5 षटकात 176 धावा केल्या. त्यामुळे त्यांनी भारतासमोर 79 धावांचे आव्हान ठेवले होते. हे आव्हान भारताने 12 षटकात 3 विकेट्स गमावत 80 धावा करून पूर्ण केले.

रोहितने म्हटले होते भेदभाव न करता द्या रेटिंग

केपटाऊन कसोटी संपल्यानंतर भारताचा कर्णधार रोहित शर्माने म्हटले होते की सामनाधिकाऱ्यांनी भेदभाव न करता खेळपट्ट्यांना रेटिंग द्यायला पाहिजे.