ICC ODI Cricket World Cup 2023, India vs New Zealand, Weather Update:

वनडे वर्ल्डकप २०२३ स्पर्धेत भारत विरुद्ध न्यूझीलंड संघात रविवारी सामना खेळवला जाणार आहे. हा सामना धरमशाला येथील हिमाचल प्रदेश क्रिकेट असोसिएशन स्टेडियमवर खेळवला जाणार आहे. हा सामना दुपारी २ वाजता सुरू होणार आहे.

यापूर्वी धरमशाला येथे झालेल्या दक्षिण आफ्रिका आणि नेदरलँड्स यांच्या सामन्यादरम्यान बराचवेळ पावसाचा अडथळा आला होता, त्यामुळे भारत आणि न्यूझीलंड सामन्यावेळीही असा अडथळा येणार का असा प्रश्न चाहत्यांना पडला आहे.

दरम्यान, AccuWeather च्या रिपोर्टनुसार रविवारी धरमशाला येथे दुपारी २ वाजताच्या सुमारास पावसाची शक्यता आहे. त्यामुळे त्याचा सामन्यावर परिणाम होऊ शकतो. तसेच रविवारी संपूर्ण दिवस वातावरण ढगाळ राहू शकते. त्याचबरोबर १८ डिग्री सेल्सियशच्या दरम्यान तापमान असू शकते, तर ५१ टक्क्यांपर्यंत आद्रता असू शकते.

भारत-न्यूझीलंड सामना अन् पाऊस

लक्षात घेण्यासारखी गोष्ट अशी की २०१९ वर्ल्डकप स्पर्धेवेळी देखील भारत आणि न्यूझीलंड यांच्यातील साखळी फेरीचा सामना पावसामुळे रद्द झाला होता.

तसेच या दोन संघात २०१९ वर्ल्डकप वेळीच उपांत्य सामनाही झालेला, ज्यातही पावसाचा मोठा अडथळा आला होता. त्यावेळी राखीव दिवशी हा सामना पूर्ण करण्यात आला होता. त्या सामन्यात भारतीय संघ १८ धावांनी पराभूत झाला होता.

दोन्ही संघ अपराजित

दरम्यान, रविवारी होणाऱ्या सामन्यात दोन्ही संघांपैकी कोणता संघ विजयाची लय कायम ठेवणार यावर देखील चाहत्यांचे लक्ष राहणार आहे. कारण या स्पर्धेत केवळ भारत आणि न्यूझीलंड हे दोन संघ अपराजित आहेत. त्यांनी आत्तापर्यंत एकही सामना पराभूत झालेला नाही.

असे आहेत दोन्ही संघ -

• भारत - रोहित शर्मा (कर्णधार), हार्दिक पंड्या (उपकर्णधार), शुभमन गिल, विराट कोहली, श्रेयस अय्यर, केएल राहुल, रवींद्र जडेजा, शार्दुल ठाकूर, जसप्रीत बुमराह, मोहम्मद सिराज, कुलदीप यादव, मोहम्मद शमी, आर अश्विन, इशान किशन, सूर्यकुमार यादव.

• न्यूझीलंड - केन विलियम्सन (कर्णधार), ट्रेंट बोल्ट, मार्क चॅपमन, डेव्हॉन कॉनवे, लॉकी फर्ग्युसन, मॅट हेन्री, टॉम लॅथम, डॅरिल मिशेल, जिमी नीशम, ग्लेन फिलिप्स, रचिन रवींद्र, मिचेल सँटनर, ईश सोधी, टिम साऊथी, विल यंग.