ICC Men’s Player of the Month nominees for November 2023:

आंतरराष्ट्रीय क्रिकेट परिषदेकडून प्रत्येक महिन्यातील सर्वोत्तम महिला आणि पुरुष क्रिकेटपटूला पुरस्कार दिला जातो. आयसीसीकडून प्रत्येक महिन्यात सर्वोत्तम कामगिरी करणाऱ्या तीन-तीन खेळाडूंना नामांकन दिले जाते. त्यानंतर एका खेळाडूची विजेता म्हणून निवड करण्यात येते.

त्यानुसार गुरुवारी (७ डिसेंबर) आयसीसीने नोव्हेंबर महिन्यासाठी या नामांकन मिळालेल्या खेळाडूंची नावे जाहीर केली आहेत.

आयसीसीने नोव्हेंबर महिन्यातील सर्वोत्तम खेळाडूच्या पुरस्कारासाठी नामांकन दिलेल्या पुरुष खेळाडूंमध्ये ऑस्ट्रेलियाचा फलंदाज ट्रेविस हेड, अष्टपैलू ग्लेन मॅक्सवेल आणि भारताचा वेगवान गोलंदाज मोहम्मद शमीचा समावेश आहे. या तिघांनीही नोव्हेंबर महिन्यात शानदार कामगिरी केली आहे.

हे तिघेही नोव्हेंबर महिन्यात वनडे वर्ल्डकप २०२३ स्पर्धेत खेळले. तसेच त्यानंतर भारत विरुद्ध ऑस्ट्रेलिया संघात झालेल्या टी२० मालिकेत ट्रेविस हेड आणि ग्लेन मॅक्सवेल खेळले.

ट्रेविस हेड

हेडने नोव्हेंबर महिन्यात वर्ल्डकप 2023 मधील 5 वनडे सामन्यांमध्ये खेळताना 44 च्या सरासरीने 220 धावा केल्या. यामध्ये त्याने उपांत्य सामना आणि अंतिम सामन्यात अनुक्रमे अर्धशतक आणि शतक केले होते.

तसेच तो या दोन्ही सामन्यात सामनावीरही ठरला होता. त्याच्या खेळामुळे त्याने ऑस्ट्रेलियाला वर्ल्डकप जिंकून देण्यात मोलाचा वाटा उचलला. त्याचबरोबर त्याने टी20 मालिकेत 3 सामन्यांत 94 धावा केल्या.

ग्लेन मॅक्सवेल

ग्लेन मॅक्सवेलने नोव्हेंबर 2023 महिन्यात वनडे वर्ल्डकप 2023 स्पर्धेत 3 वनडेत 204 धावा केल्या. यातील दोन सामन्यात तो नाबाद राहिला. तसेच यात त्याने अफगाणिस्तानविरुद्ध केलेल्या 201 धावांच्या नाबाद द्विशतकी खेळीचा समावेश आहे. तसेच त्याने 2 विकेट्स घेतल्या.

याशिवाय मॅक्सवेलने भारताविरुद्ध दोन टी20 सामने खेळताना 116 धावा केल्या. यामध्ये एका शतकाचा समावेश आहे.

मोहम्मद शमी

मोहम्मद शमीने नोव्हेंबर महिन्यात वनडे वर्ल्डकप 2023 स्पर्धेत 5 सामने खेळताना 15 विकेट्स घेतल्या. यामध्ये दोनदा त्याने एका सामन्यात 5 विकेट्स घेण्याचा पराक्रम केला. विशेष म्हणजे त्याने न्यूझीलंडविरुद्ध वर्ल्डकपच्या उपांत्य सामन्यात 57 धावांत 7 विकेट्स घेतल्या.

या महिला खेळाडूंना नामांकन

याशिवाय आयसीसीने नोव्हेंबर महिन्यातील सर्वोत्तम खेळाडूच्या पुरस्कारासाठी नामांकन दिलेल्या पुरुष खेळाडूंमध्ये बांगलादेशच्या नाहिदा अख्तर आणि फरंगा होक यांच्यासह पाकिस्तानच्या सादिया इक्बालचा समावेश आहे.