World Cup 2023: भारतात खेळला जात असलेला एकदिवसीय विश्वचषक 2023 शेवटच्या टप्प्यात आहे. भारत, दक्षिण आफ्रिका आणि ऑस्ट्रेलिया हे तीन संघ उपांत्य फेरीसाठी पात्र ठरले आहेत. आता एक संघ पात्र ठरण्यासाठी बाकी आहे.

पाकिस्तान, न्यूझीलंड आणि अफगाणिस्तान हे चौथ्या संघाच्या शर्यतीत असले तरी 9 नोव्हेंबरला न्यूझीलंडने श्रीलंकेचा पराभव करुन पाकिस्तानच्या आशा धुळीस मिळवल्या आहेत. आता उपांत्य फेरीसाठीचा चौथा संघ न्यूझीलंड हा जवळपास निश्चित झाला आहे.

आयसीसीने इम्रान खान यांना फायनलसाठी आमंत्रित केले

विश्वचषक 2023 चे उपांत्य फेरीचे सामने 15 आणि 16 नोव्हेंबर रोजी खेळवले जातील. तर अंतिम सामना 19 नोव्हेंबरला अहमदाबादच्या नरेंद्र मोदी स्टेडियमवर होणार आहे.

अंतिम सामन्यासाठी, आयसीसीने सर्व विश्वचषक विजेत्या कर्णधारांना सामना पाहण्यासाठी निमंत्रण पाठवले आहे. ज्यामध्ये 1992 मध्ये पाकिस्तान संघाला त्यांच्या नेतृत्वाखाली पहिला विश्वचषक जिंकून देणारे इम्रान खान यांचाही समावेश आहे.

मात्र, इम्रान खान (Imran Khan) विश्वचषक 2023 चा अंतिम सामना पाहू शकणार नाही. पाकिस्तानचे माजी पंतप्रधान इम्रान खान सध्या तुरुंगात असून त्यांचा जामीन अर्जही फेटाळण्यात आला आहे. त्यामुळे इम्रान खान विश्वचषक 2023 चा अंतिम सामना पाहू शकणार नाहीत.

पाक संघ उपांत्य फेरीच्या शर्यतीतून जवळपास बाहेर पडला आहे

एकदिवसीय विश्वचषक 2023 मध्ये पाकिस्तान संघाचा शेवटचा लीग सामना 11 नोव्हेंबर रोजी इंग्लंडसोबत होणार आहे. जर पाकिस्तान संघाला उपांत्य फेरीत प्रवेश करायचा असेल तर त्यांना इंग्लंडचा 200 हून अधिक धावांनी पराभव करावा लागेल. जे इतके सोपे नाही.

त्यानंतर आता पाकिस्तानचा (Pakistan) संघ उपांत्य फेरीच्या शर्यतीतून बाहेर पडल्याचे दिसत आहे. आता केवळ चमत्कार झाला तरच पाकिस्तानचा संघ उपांत्य फेरीत स्थान मिळू शकतो. दुसऱ्यांदा विश्वचषक जिंकण्याचे पाकिस्तानचे स्वप्न भंगणार आहे.