ICC Announced Women's and Men's Player of the Month Winners for December 2023:

आंतरराष्ट्रीय क्रिकेट परिषदेने (ICC) डिसेंबर 2023 महिन्यातील सर्वोत्तम क्रिकेटपटूंच्या पुरस्काराची घोषणा केली आहे. गेल्याच आठवड्यात आयसीसीने डिसेंबर 2023 महिन्यात सर्वोत्तम महिला आणि पुरुष खेळाडूच्या पुरस्कारासाठी नामांकने जाहीर केली होती.

त्यातून आता महिलांमध्ये सर्वोत्तम खेळाडूचा पुरस्कार भारताच्या दिप्ती शर्माने जिंकला आहे. तसेच पुरुषांमध्ये सर्वोत्तम खेळाडूचा पुरस्कार ऑस्ट्रेलिया कर्णधार पॅट कमिन्सने जिंकला आहे.

दिप्ती डिसेंबरमधील सर्वोत्तम महिला खेळाडू

दिप्तीने डिसेंबर 2023 महिन्यातील सर्वोत्तम पुरस्कार जिंकताना संघसहकारी जेमिमा रोड्रिग्स आणि झिम्बाब्वेची प्रिशियस मरांगे यांना मागे टाकले आहे. दिप्तीने डिसेंबर 2023 महिन्यात भारताकडून इंग्लंड आणि ऑस्ट्रेलियाविरुद्ध खेळताना शानदार कामगिरी केली होती.

दिप्तीने फलंदाजी आणि गोलंदाजी असे दोन्ही क्षेत्रात तिचे योगदान दिले. तिने इंग्लंडविरुद्धच्या कसोटीत 9 विकेट्स घेतल्या आणि एक अर्धशतकही केले. त्याचबरोबर ऑस्ट्रेलियाविरुद्ध कसोटी सामन्यात तिने 78 धावांची खेळी करण्याबरोबरच गोलंदाजीतही चांगले योगदान दिले होते.

तिने ऑस्ट्रेलियाविरुद्ध वनडे मालिकेतील दुसऱ्या सामन्यात 5 विकेट्स घेतल्या होत्या. तिने डिसेंबर 2023 महिन्यात 225 धावा करण्याबरोबरच 19 विकेट्स घेतल्या.

कमिन्स डिसेंबरमधील सर्वोत्तम पुरुष खेळाडू

डिसेंबर 2023 महिन्यातील सर्वोत्तम पुरुष खेळाडूचा पुरस्कार पॅट कमिन्सने जिंकला. हा पुरस्कार जिंकताना त्याने बांगलादेशच्या तैजुल इस्लाम आणि न्यूझीलंडच्या ग्लेन फिलिप्स यांना मागे टाकले.

तैजुल आणि फिलिप्स यांनाही आयसीसीकडून डिसेंबर 2023 महिन्यातील सर्वोत्तम खेळाडूच्या पुरस्कारासाठी नामांकन मिळाले होते. कमिन्सने डिसेंबर 2023 मध्ये पाकिस्तानविरुद्ध दोन कसोटी सामने खेळले.

या 2 कसोटीत मिळून त्याने 13 विकेट्स घेतल्या. त्याने मेलबर्नला झालेल्या कसोटीत दोन्ही डावात प्रत्येकी 5 विकेट्स घेतल्या होत्या, तर पर्थला खेळलेल्या कसोटीत दोन्ही डावात मिळून 3 विकेट्स घेतल्या होत्या.