Indian Women Cricket: भारतीय क्रिकेट नियामक मंडळाने महिला क्रिकेट संघाबाबत मोठा निर्णय घेतला आहे. भारताचे माजी क्रिकेटपटू हृषिकेश कानिटकर यांना वरिष्ठ भारतीय महिला संघाचे फलंदाजी प्रशिक्षक म्हणून नेमण्यात आले आहे.

त्यामुळे ते 9 डिसेंबरपासून ऑस्ट्रेलिया महिला संघाविरुद्ध सुरू होणाऱ्या 5 सामन्यांच्या टी20 मालिकेपासून संघाशी जोडले जातील.

दरम्यान भारतीय महिला संघाचे (Indian Women Cricket Team) माजी प्रशिक्षक रमेश पोवार यांना बंगळुरूमधील राष्ट्रीय क्रिकेट अकादमीमध्ये (NCA) नियुक्त करण्यात आले आहे. त्यामुळे आता ते एनसीएचे प्रमुख व्हीव्हीएस लक्ष्मण यांच्या टीममध्ये सहभागी होतील आणि भारतीय पुरुष क्रिकेटसाठी काम करतील.

भारतीय महिला संघाच्या फलंदाजी प्रशिक्षकपदी नियुक्ती झाल्याबद्दल पुण्यातील जन्म असणारे हृषिकेश कानिटकर (Hrishikesh Kanitkar) म्हणाले, 'वरिष्ठ महिला संघाचा नवीन फलंदाजी प्रशिक्षक म्हणून नियुक्ती झाल्याबद्दल अभिमान वाटत आहे. या संघात खूप गोष्टींबाबत संभावना आहेत आणि संघात युवा आणि अनुभवी खेळाडूंचे चांगले मिश्रण आहे.'

'मला खात्री आहे हा संघ पुढील आव्हानांसाठी सज्ज आहे. आमच्यासमोर काही महत्त्वाच्या स्पर्धा आहेत. संघ आणि मी येणाऱ्या स्पर्धांसाठी उत्सुक आहोत.'

भारतीय महिला संघ 9 ते 20 डिसेंबरदरम्यान ऑस्ट्रेलिया महिला संघाविरुद्ध मुंबईत 5 सामन्यांची टी20 मालिका खेळणार आहे.