भारताचा माजी ऑफस्पिनर हरभजन सिंग (Harbhajan Singh) क्रिकेटच्या मैदानात पुन्हा परतण्याच्या तयारीत आहे. हरभजन सिंग टीम इंडियाच्या (Team India) जर्सीत दिसणार नसला तरी लेजेंड्स क्रिकेट लीगमध्ये खेळताना दिसून येणार आहे. तसेच लिजेंड्स क्रिकेट लीगचा दुसरा सीझन येत्या सप्टेंबरमध्ये खेळवला जाणार आहे. (Harbhajan Singh to play in second edition of legends league cricket)

42 वर्षीय हरभजन सिंग व्यतिरिक्त भारताचा माजी सलामीवीर वीरेंद्र सेहवाग (Virender Sehwag), इरफान पठाण (Irfan Pathan), त्याचा मोठा भाऊ युसूफ पठाण (Yusuf Pathan), ऑस्ट्रेलियाचा माजी वेगवान गोलंदाज ब्रेट ली, श्रीलंकेचा महान फिरकी गोलंदाज मुथय्या मुरलीधरन आणि विश्वचषक विजेता इंग्लंडचा माजी कर्णधार इऑन मॉर्गन यांचाही या लीगमध्ये समावेश असणार आहे.

लीगच्या दुसऱ्या सत्रात 4 संघ आणि 110 माजी क्रिकेटपटू खेळताना दिसून येणार आहेत. 2021 मध्ये आंतरराष्ट्रीय क्रिकेटला अलविदा करणाऱ्या हरभजनने याबाबत सांगितले की, 'मैदानावर परतण्यासाठी मी उत्साही आहे.' दरम्यान, वेस्ट इंडिजचे माजी क्रिकेटपटू लेंडल सिमन्स आणि दिनेश रामदिन हे देखील आगामी हंगामासाठी खेळाडूंच्या यादीमध्ये दिसून येणार आहेत.

हरभजन सिंगने आपल्या कारकिर्दीत 103 कसोटी, 236 एकदिवसीय आणि 28 टी-20 आंतरराष्ट्रीय सामने खेळले आहेत तर त्याच्या नावावर कसोटीत 417, एकदिवसीय सामन्यात 269 आणि T20 आंतरराष्ट्रीय फॉरमॅटमध्ये 25 विकेट देखील आहेत. हरभजनने कसोटीत 2 शतके आणि 9 अर्धशतकेही केली आहेत.