Syed Mushtaq Ali Trophy 2023: के. व्ही. सिद्धार्थ व कर्णधार दर्शन मिसाळ यांनी विजयासाठी २१७ धावांचे लक्ष्य गाठण्यासाठी झुंजार प्रयत्न केले, पण अखेरीस ते तोकडे ठरले.

सय्यद मुश्ताक अली करंडक टी-२० क्रिकेट स्पर्धेच्या क गटात गुजरातने १५ धावांनी विजय मिळविल्यामुळे गोव्याला लागोपाठ दोन सामने जिंकल्यानंतर पहिल्या पराभवाचा सामना करावा लागला.

झारखंडमधील रांची येथे झालेल्या सामन्यात गुजरातने नाणेफेक जिंकून प्रथम फलंदाजी स्वीकारली. त्यांनी निर्धारित २० षटकांत ७ बाद २१६ धावा केल्या, नंतर उत्तरादाखल गोव्याला ६ बाद २०१ धावांची मजल मारता आली.

ईशान गडेकर व राहुल त्रिपाठी यांनी ५.३ षटकांत ५४ धावांची आक्रमक सलामी दिल्यानंतर गोव्याची ३ बाद ६७ अशी घसरगुंडी उडाली.

मात्र नंतर सिद्धार्थने दीपराज गावकर याच्या चौथ्या विकेटसाठी ५८ धावांची भागीदारी करून गोव्याला सावरले. नंतर सिद्धार्थने दर्शनसह पाचव्या विकेटसाठी ५९ धावांची भागीदारी केल्यामुळे गोव्याला संधी प्राप्त झाली.

मात्र सिद्धार्थ बाद झाल्यानंतर, चेंडू व धावांचे अंतर कमी झाल्याने विजय हुकला. दर्शनने स्पर्धेत सलग दुसरे अर्धशतक नोंदविले.

संक्षिप्त धावफलक

गुजरात: २० षटकांत ७ बाद २१६ (ऊर्विल पटेल ४६, आर्य देसाई २५, उमंग कुमार २३, सौरव चौहान ३६, चिराग गांधी २६, रिपल पटेल २९, अर्जुन तेंडुलकर ४-०-५७-२, शुभम तारी ४-०-३२-१, लक्षय गर्ग ४-०-४५-२, मोहित रेडकर ४-०-४२-२, दीपराज गावकर ३-०-२३-०, विकास सिंग १-०-१५-०) वि

वि. गोवा : २० षटकांत ६ बाद २०१ (ईशान गडेकर ३२, राहुल त्रिपाठी २२, के. व्ही. सिद्धार्थ ५३- ३७ चेंडू, ५ चौकार, १ षटकार, सुयश प्रभुदेसाई ८, दीपराज गावकर ३०, दर्शन मिसाळ नाबाद ५०- २० चेंडू, ३ चौकार, ५ षटकार, तुनीष सावकार ०, मोहित रेडकर नाबाद १, शेन पटेल ४-३६, रवी बिष्णोई १-२४, पियुष चावला १-३८).