Goa's Swimmer Xavier Dsouza wins Bronz in National game: गोव्याचा आघाडीचा पुरुष जलतरणपटू झेवियर डिसोझा याने सलग तिसऱ्या वर्षी राष्ट्रीय सीनियर जलतरण स्पर्धेत पदक जिंकण्याचा पराक्रम साधला. हैदराबाद येथे सुरू असलेल्या 76व्या स्पर्धेत त्याने मंगळवारी ब्राँझपदकाची कमाई केली.

स्पर्धेत झेवियरला 100 मीटर बॅकस्ट्रोक शर्यतीत पदक थोडक्यात हुकले होते, त्या शर्यतीत त्याला चौथा क्रमांक मिळाला होता. मंगळवारी स्पर्धेतील वैयक्तिक शेवटच्या शर्यतीत 50 मीटर बॅकस्ट्रोकमध्ये त्याने 26.80 सेकंद वेळ नोंदविताना तिसरा क्रमांक पटकावला.

सेनादलाच्या पी. एस. मधू याने 26.60 सेकंद वेळेसह सुवर्ण, तर कर्नाटकाच्या बेनेडिक्टन रोहित याने 26.77 सेकंद वेळेसह रौप्यपदक पटकावले. 50 मीटर बॅकस्ट्रोकच्या पात्रता फेरीत सकाळच्या सत्रात झेवियरने 27.25 सेकंद वेळ नोंदविली, नंतर मुख्य फेरीत कामगिरी आणखी वेगवान करताना त्याने ब्राँझपदकावर हक्क सांगितला.

यावेळच्या राष्ट्रीय सीनियर जलतरण स्पर्धेत गोव्याचे हे दुसरे पदक ठरले. झेवियरप्रमाणे सोमवारी श्रुंगी बांदेकर हिने महिला गटात 200 मीटर मेडली शर्यतीत तिसरा क्रमांकाचे पदक जिंकले होते.

पदकांची मालिका कायम

बंगळूर येथे रे सेंटर जलतरण संकुलात भूषण कुमार यांच्या मार्गदर्शनाखाली सराव करणाऱ्या झेवियर डिसोझाने सलग तिसऱ्या वर्षी राष्ट्रीय सीनियर स्पर्धेत पदक जिंकले. 2021मध्ये बंगळूर येथे झालेल्या स्पर्धेत त्याने दोन ब्राँझपदके, तर 2022 मध्ये गुवाहाटी येथे झालेल्या स्पर्धेत एक सुवर्ण व एक रौप्यपदक जिंकले होते.