सासष्टी: वेळ्ळी (Velli) मतदारसंघात दहा वर्षांपूर्वी फुटबॉल स्टेडियम (Football stadium) उभारण्याच्या प्रकल्पाला (Project) सुरुवात करण्यात आली होती. हे स्टेडियम साधनसुविधांनी युक्त असून फक्त फुटबॉल मैदान उभारण्याचे काम बाकी राहिले आहे. गेल्या पाच वर्षांपासून स्टेडियम तशाच स्थितीत असून अद्याप काम पूर्ण झालेले नाही. वेळ्ळीतील युवा खेळाडूंच्या भविष्‍यासाठी हे स्टेडियम त्वरित पूर्ण करावे, अशी मागणी वेळ्ळीवासीयांनी केली आहे.

वेळ्ळीचे माजी आमदार बेंजामिन सिल्वा यांनी या फुटबॉल स्टेडियमच्या बांधकामाला सुरुवात केली होती. या स्टेडियमवर खेळाडूंसाठी लागणाऱ्या सर्व सुविधा उपलब्ध असून फक्त फुटबॉल मैदान उभारण्याचे काम बाकी आहे. सिल्वा यांच्‍यानंतर वेळ्ळीत फिलिप नेरी रॉड्रिग्‍स निवडून आले. पण त्‍यांच्‍या काळात या स्‍टेडियमच्‍या कामाला गती मिळाली नाही. सिल्वा यांनी तरी लक्ष घालून स्टेडियम पूर्ण करण्यासाठी प्रयत्न करणे आवश्यक होते, असे फा. अॅलन तावारीस यांनी सांगितले.

फुटबॉल स्टेडियम उभारण्यात येणाऱ्या जागेत अगोदर शेती करण्यात येत होती. नंतर या ठिकाणी कार्यक्रम तसेच फुटबॉल स्पर्धा आयोजित करण्यात येऊ लागल्या. पण, जेव्हा बेंजामिन सिल्वा हे आमदार म्हणून निवडून आले तेव्‍हा त्यांनी या ठिकाणी फुटबॉल स्टेडियम उभारण्याचा निर्णय घेतला. या निर्णयास लोकांकडूनही भरघोस पाठिंबा मिळाला. स्टेडियमवर साधनसुविधा उभारण्यात आल्या आहेत. पण, याचा लाभ स्थानिकांना मिळत नाही, असे तावारीस यांनी सांगितले.