Goa University Intecollege Football: गोवा विद्यापीठाच्या आंतरमहाविद्यालयीन पुरुष फुटबॉल स्पर्धेत आसगावचे डीएम्स महाविद्यालय, कुंकळ्ळीचे सीईएस महाविद्यालय, म्हापशाचे श्रीदोरा काकुलो महाविद्यालय, साखळी सरकारी महाविद्यालयाने उपांत्यपूर्व फेरीत प्रवेश केला.

ताळगाव पठारावरील विद्यापीठ मैदानावर बुधवारी झालेल्या लढतीत डीएम्स महाविद्यालयाने वेर्णा येथील पाद्री कोसेसाव अभियांत्रिकी महाविद्यालयास 2-0 असे हरविले, दोन्ही गोल विस्मय डावरे याने केले. त्याने 15 व 30 व्या मिनिटास गोल नोंदविला.

अन्य लढतीत सीईएस महाविद्यालयाने बोरीच्या स्वामी विवेकानंद महाविद्यालयाचा 7-0 फरकाने धुव्वा उडविला. प्रणय गावकर याने हॅटट्रिक साधली, तर संदीप चौधरीने दोन, तर प्रणय वेळीपने एक गोल नोंदविला.

नावेली येथील रोझरी मैदानावर श्रीदारो काकुलो महाविद्यालयाने आसगावच्या आग्नेल इन्स्टिट्यूटचा 5-0 असा एकतर्फी पराभव केला. नरेंद्र नाईक व अमन गोवेकर यांनी प्रत्येकी दोन, तर साईदीप पोंबुर्फेकर याने एक गोल नोंदविला.

आणखी एका उपउपांत्यपूर्व सामन्यात चुरस पाहायला मिळाली. अटीतटीच्या लढतीत साखळी सरकारी महाविद्यालयाने विहाल दास याने 68 व्या मिनिटास केलेल्या गोलमुळे पेडणे सरकारी महाविद्यालयास एका गोलने निसटते हरविले.

दरम्यान, आंतमहाविद्यालयीन महिला फुटबॉल स्पर्धेत तिर्था कुंकळ्येकर हिने नोंदविलेल्या चार शानदार गोलच्या बळावर फर्मागुढीच्या गोवा अभियांत्रिकी महाविद्यालयाने आसगावच्या आग्नेल इन्स्टिट्यूटला 4-0 असे सहज हरविले.