Goa: राष्ट्रीय सबज्युनियर-ज्युनियर जलतरण स्पर्धेत (Swimming Tournament) गोव्याची गुणवान जलतरणपटू संजना प्रभुगावकर (Swimmer Sanjana Prabhugaonkar) हिने पदकविजेती कामगिरी शुक्रवारीही कायम राखली. स्पर्धेतील वैयक्तिक दुसरे रौप्य, तर एकंदरीत तिसरे पदक तिने पटकाविले.

राष्ट्रीय जलतरण स्पर्धा बंगळूर येथे सुरू आहे. पर्वरी येथील आर्डी स्कूलमध्ये नवव्या इयत्तेत शिकणाऱ्या संजनाने शुक्रवारी मुलींच्या गट एकमधील 100 मीटर बॅकस्ट्रोक शर्यतीत रौप्यपदकाची कमाई केली. संजनाने शर्यत 1 मिनिट 08.48 सेकंद वेळेत पूर्ण केली. कर्नाटकच्या निना व्यंकटेश (1 मिनिट 06.65 सेकंद) हिला सुवर्णपदक मिळाले, तर महाराष्ट्राच्या पलक धामी (1 मिनिट 08.81 सेकंद) हिला ब्राँझपदकावर समाधान मानावे लागले.

संजनाने स्पर्धेत यापूर्वी 200 मीटर बॅकस्ट्रोकमध्ये 2 मिनिटे 28.71 सेकंद वेळेसह सुवर्णपदक जिंकले होते. त्यानंतर 50 मीटर बॅकस्ट्रोकमध्ये तिने 31.63 सेकंद वेळेसह रौप्यपदकाची कमाई केली. संजनाने आतापर्यंत स्पर्धेत एक सुवर्ण व दोन रौप्यपदके जिंकली आहेत.