पणजीः राज्यस्तरीय फुटसाल (Goa State Futsal) विजेतेपदासाठी आठ संघांत चुरस असेल. गोवा फुटबॉल असोसिएशनची (Goa Football Association) स्पर्धा येत्या एक सप्टेंबरपासून नुवे येथे खेळली जाईल. स्पर्धेचे यंदा पहिलेच वर्ष आहे. स्पर्धेचा अंतिम सामा 12 सप्टेंबरला होईल. सर्व लढती नुवे येथील एम्पायर स्पोर्टस मैदानावर होतील. विजेता संघ अखिल भारतीय फुटबॉल महासंघाच्या राष्ट्रीय पातळीवरील फुटसाल स्पर्धेत गोव्याचे प्रतिनिधित्व करेल. स्पर्धेच्या अ गटात एफसी वायएफए, स्पोर्टिंग क्लब द गोवा, शिरवडे स्पोर्टस क्लब व यूथ क्लब ऑफ मनोरा हे संघ, तर ब गटात सांताक्रूझ क्लब केळशी, पणजी फुटबॉलर्स, गोवा वेल्हा स्पोर्टस क्लब, आंबेली स्पोर्टस क्लब या संघांचा समावेश आहे.

दोन्ही गटातील पहिले दोन संघ उपांत्य फेरीसाठी पात्र ठरतील. ही फेरी सात सप्टेंबरला होईल. स्पर्धेच्या पहिल्या दिवशी स्पोर्टिंग क्लबसमोर एफसी वायएफए संघाचे, तर शिरवडे क्लबसमोर यूथ क्लब मनोरा संघाने आव्हान असेल. स्पर्धा फिफाच्या फुटसाल नियमानुसार खेळली जाईल, तसेच कोविड-19 प्रतिबंधक शिष्टाचाराचेही काटेकोर पालन केली जाईल, असे जीएफएने स्पष्ट केले आहे. स्पर्धेचा ड्रॉ जीएफए फुटसाल समितीचे अध्यक्ष बाबली मांद्रेकर, सहअध्यक्ष जॉन सिल्वा, जीएफए कार्यकारी समिती सदस्य वेल्विन मिनेझिस, फ्रान्सिस नुनीस, फ्रँकी फर्नांडिस, सचिव जोवितो लोपिस यांच्या उपस्थितीत झाला.