Goa Football Association News : गोवा फुटबॉल असोसिएशनच्या (जीएफए) 2023-24 मधील राज्यस्तरीय फुटबॉल मोसमाला 20 ऑगस्टपासून सुरवात होईल. त्या दिवशी प्रो-लीग स्पर्धेतील गतविजेता धेंपो स्पोर्टस क्लब व गतउपविजेता स्पोर्टिंग क्लब द गोवा यांच्यात मदतनिधी सामना खेळला जाईल.

जीएफएच्या गोवा प्रोफेशनल लीग फुटबॉल स्पर्धेस २७ ऑगस्टपासून सुरवात होईल, अशी माहिती संघटनेच्या सोमवारी झालेल्या कार्यकारिणी बैठकीनंतर अध्यक्ष कायतान फर्नांडिस यांनी दिली.

‘‘२०२३-२४ मोसमाची घोषणा करताना मला आनंद होत आहे. २० ऑगस्ट रोजी धेंपो क्लब व स्पोर्टिंग क्लब द गोवा यांच्यात मदतनिधी सामना होईल. २७ ऑगस्टपासून १३ संघांची प्रो-लीग स्पर्धा सुरू होईल. रोमांचक फुटबॉल मोसमाची अपेक्षा आहे,’’ असे कायतान म्हणाले.

प्रो-लीग स्पर्धेत यंदा एकूण चार नवे संघ पदार्पण करत आहेत. प्रथम विभागीय स्पर्धेतून यंग बॉईज ऑफ टोंक (वायबीटी) संघाने पात्रता मिळविली. नंतर साळगावकर एफसीने माघार घेतल्यामुळे प्रथम विभागातील तिसऱ्या क्रमांकावरील कुठ्ठाळी व्हिलेजर्सला जीएफएने संधी दिली. जीनो स्पोर्टस क्लब व पॅक्स ऑफ नागोवा हे प्रो-लीग स्पर्धेतील थेट प्रवेश देण्यात आलेले दोन संघ आहेत.

स्पोर्टिंगचे वाझ नवे स्वीकृत सदस्य

साळगावकर एफसीचे ॲडलियर डिक्रूझ संघटनेबाहेर जात असल्याने जीएफएच्या स्वीकृत सदस्यपदी स्पोर्टिंग क्लब द गोवाचे संचालक डायगो नॅथन वाझ यांची नियुक्ती केल्याची माहिती कायतान यांनी दिली.

‘‘गोमंतकीय फुटबॉलमध्ये ॲडलियर यांनी दिलेल्या अमूल्य योगदानाबद्दल आम्ही त्यांचे आभारी आहोत. आता, व्यावसायिक लीग क्लबचे प्रतिनिधी या नात्याने जीएफए कार्यकारी समितीत आम्ही तरुण आणि गतिमान डायगो नॅथन यांचे स्वागत करत आहोत. त्यांच्या क्षमतेवर आणि खेळाप्रती वचनबद्धतेवर आमचा पूर्ण विश्वास असून जीएफए त्यांना शुभेच्छा देत आहे,’’ असे कायतान यांनी नमूद केले.