Gautam Gambhir Rajasthan Royals offer

भारतीय क्रिकेट संघाचे मुख्य प्रशिक्षक गौतम गंभीर सध्या एका मोठ्या चर्चेच्या केंद्रस्थानी आले आहेत. आयपीएल २०२४ मध्ये कोलकाता नाईट रायडर्सला (KKR) विजेतेपद मिळवून दिल्यानंतर गंभीरने भारतीय संघाची धुरा सांभाळली. मात्र, आता राजस्थान रॉयल्सच्या (RR) नवीन मालकांनी गंभीरला पुन्हा आयपीएलमध्ये आणण्यासाठी एक अत्यंत आकर्षक आणि ऐतिहासिक प्रस्ताव दिल्याचे वृत्त समोर आले आहे. या 'ट्रिपल रोल'च्या ऑफरमुळे क्रिकेट वर्तुळात मोठी खळबळ उडाली आहे.

'दैनिक जागरण'ने दिलेल्या वृत्तानुसार, राजस्थान रॉयल्सच्या मालकी हक्कांमध्ये सध्या मोठे बदल होत आहेत. या फ्रँचायझीमधील बहुतांश भागधारक आपले शेअर्स नवीन मालकांना विकण्याच्या तयारीत आहेत. याच नवीन व्यवस्थापनातील एका मालकाने गंभीरला केवळ प्रशिक्षक किंवा मार्गदर्शक म्हणून नव्हे, तर चक्क व्यवसायात भागीदारीचा प्रस्ताव दिला आहे. यामध्ये गंभीरला संघाचा 'CEO' (मुख्य कार्यकारी अधिकारी), 'मेंटर' (मार्गदर्शक) आणि फ्रँचायझीमध्ये २ ते ३ टक्के हिस्सा देण्याची तयारी दर्शवण्यात आली आहे.

हा प्रस्ताव कितीही फायदेशीर असला, तरी लोढा समितीच्या शिफारसींनुसार भारतीय क्रिकेटमध्ये 'कॉन्फ्लिक्ट ऑफ इंटरेस्ट' हा नियम लागू आहे. सर्वोच्च न्यायालयाच्या निर्णयानुसार, कोणतीही व्यक्ती एकाच वेळी भारतीय राष्ट्रीय संघाचे पद आणि आयपीएल फ्रँचायझीचे पद भूषवू शकत नाही. त्यामुळे जर गंभीरला राजस्थान रॉयल्सची ही 'रॉयल ऑफर' स्वीकारायची असेल, तर त्याला भारतीय संघाच्या मुख्य प्रशिक्षकपदाचा राजीनामा द्यावा लागेल.

गंभीरची सध्याची भूमिका आणि करार

गौतम गंभीरचा भारतीय क्रिकेट नियामक मंडळासोबतचा (BCCI) करार २०२७ च्या एकदिवसीय विश्वचषकापर्यंत आहे. सध्या तो भारतीय टी-२० विश्वचषक मोहिमेचे नेतृत्व करत असून टीम इंडियाने सुपर-८ मध्ये धडक मारली आहे. गंभीरच्या जवळच्या सूत्रांनी दिलेल्या माहितीनुसार, तो सध्या आपल्या राष्ट्रीय कर्तव्याला प्राधान्य देत आहे. मात्र, आयपीएलमधील ही अभूतपूर्व ऑफर भविष्यात कोणती नवी वळणे घेते, याकडे सर्वांचे लक्ष लागले आहे.