Brett Lee Shares Video of Fans Chasing him: भारतात क्रिकेट सर्वात लोकप्रिय खेळ आहे. त्यामुळे क्रिकेटपटूंना भेटण्यासाठी चाहते नेहमीच उत्सुक असतात. केवळ भारतीयच नाही, तर परदेशी खेळाडूंचीही भारतात मोठ्या प्रमाणात लोकप्रियता दिसून येते. भारतात लोकप्रिय परदेशी खेळाडूंपैकी ब्रेट ली देखील आहे. नुकताच त्याने भारतीय चाहत्यांचा एक व्हिडिओ सोशल मीडियावर शेअर केला आहे.

ब्रेट लीने व्हिडिओ शेअर करताना भारतीय नागरिकांमधील क्रिकेटबद्दलच्या प्रेमाचे कौतुकही केले आहे. दरम्यान, ब्रेट लीने शेअर केलेल्या व्हिडिओमध्ये दिसते की तो कारमध्ये बसला असून त्याच्या कारचा पाठलाग दोन चाहते स्कुटीवरून करत आहेत. यामध्ये स्कुटी चालवणाऱ्या युवकाने रॉयल चॅलेंजर्स बेंगलोर संघाची जर्सी घातलेली आहे.

तसेच तो युवक ब्रेट लीला एक सेल्फी घेण्यासाठी विनंती करत आहे. पण यावेळी ब्रेट ली कारमध्ये होता. त्यामुळे तो त्यांना स्कुटी चालवताना काळजी घेण्यास सांगत होता. यावेळी तो हिंदीत त्यांना 'आरामसे आरामसे' असे म्हणतानाही दिसतो. त्याचबरोबर तो त्यांना हेल्मेट घालण्यासही सांगत आहे.

ब्रेट लीने शेअर केलेल्या या व्हिडिओला लाखो लाईक्स आल्या असून अनेक युजर्सने त्यांच्या प्रतिक्रिया दिल्या आहेत. ब्रेट लीने या व्हिडिओच्या कॅप्शनमध्ये लिहिले आहे की 'भारतात नेहमीच सुंदर सरप्राईज मिळत असतात. त्यांचे प्रेम आवडते.' याबरोबरच त्याने कॅप्शनमध्ये हेल्मेट घालण्याबद्दल सल्लाही दिला आहे.

दरम्यान, ब्रेट ली सध्या आयपीएल 2023 चे समालोचन करण्यासाठी भारतात आहे. तो अनेकदा भारतात येत असतो. त्याने 'अनइंडियन' या ऑस्ट्रेलियन-भारतीय चित्रपटात कामही केले आहे.

ब्रेट ली हा ऑस्ट्रेलियाचा दिग्गज वेगवान गोलंदाज आहे. त्याने त्याच्या कारकिर्दीत अनेकदा ऑस्ट्रेलियाला मोठे विजय मिळवून देण्यात मोलाचा वाटा उचलला आहे. त्याने 76 कसोटी सामने खेळले असून 310 विकेट्स घेतल्या आहेत. तसेच त्याने 221 वनडे सामन्यांमध्ये 380 विकेट्स घेतल्या आहेत. त्याचबरोबर त्याने 25 आंतरराष्ट्रीय टी20 सामने खेळताना 28 विकेट्स घेतल्या आहेत. त्याने आंतरराष्ट्रीय कारकिर्दीत 8 अर्धशतकांसह 2500 हून अधिक धावाही केल्या आहेत.