FIFA World Cup Matches Watch In Inox: फिफा फुटबॉल वर्ल्डकपचा थरार 20 नोव्हेंबरपासून सुरू झाला आहे. देशतील फुटबॉलप्रेमींना हा थरार मोठ्या पडद्यावर अनुभवता यावा यासाठी देशातील आघाडीची मल्टीप्लेक्स चेन असलेल्या आयनॉक्स लीजर लिमिटेडने बुधवारी मोठी घोषणा केली.

आयनॉक्स आपल्या थिएटर्समध्ये फुटबॉल वर्ल्डकपमधील सामन्यांचे लाईव्ह प्रक्षेपण करणार आहे. देशातील 15 शहरांमधील 22 मल्टीप्लेक्सेसमध्ये आयनॉक्स लाईव्ह मॅचेस दाखवणार आहे. फुटबॉलप्रेमींना मुंबई, दिल्ली, गुरुग्राम, कोलकाता, पुणे, गोवा, भुवनेश्वर, जयपुर, सिलीगुड़ी, सूरत, इंदूर, बडोदा, धनबाद आणि त्रिशूर येथील आयनॉक्स मल्टीप्लेक्समध्ये सामने पाहता येणार आहेत.

2 डिसेंबरपासून स्पर्धेतील नॉकआऊट राऊंडला सुरवात होत आहे. स्पर्धेचा अंतिम सामना 18 डिसेंबर रोजी होणार आहे. स्पर्धेत एकुण 32 संघांचा समावेश आहे.

आयनॉक्स लीजर लिमिटेडचे सीईओ आलोक टंडन म्हणाले, "आम्ही आमच्या पाहुण्यांचे स्वागत करण्यासाठी सज्ज आहोत. काही गोष्टी देशातील लोकांना एकत्र आणतात. त्यामध्ये खेळाचाही समावेश आहे. आम्ही आयनॉक्सच्या मोठ्या पडद्यावर सर्वात मोठा क्रीडा इव्हेंट असलेल्या फिफा वर्ल्डकपमधील सामन्यांचे आयोजन करण्यासाठी खूप एक्साईट आहोत.

दरम्यान, आयनॉक्सने यापुर्वी ऑक्टोबर-नोव्हेंबरमध्ये ऑस्ट्रेलियात झालेल्या पुरूषांच्या टी-20 वर्ल्ड कपमधील सर्व सामने थिएटरमध्ये दाखवले होते. त्यासाठी आयनॉक्सने आयसीसीसोबतही करार केला होता.