भारतीय क्रिकेटमध्ये 6 डिसेंबर ही तारीख खूपच खास आहे. कारण या दिवशी एक-दोन नाही, तर तब्बल 5 भारतीय क्रिकेटपटूंचा वाढदिवस असतो. विशेष म्हणजे या पाचही जणांनी आपली एक वेगळी ओळख बनवली आहे. याच 5 क्रिकेटपटूंबद्दल जाणून घेऊ.

आरपी सिंग -

भारताचा माजी वेगवान गोलंदाज आरपी सिंगचा जन्म 6 डिसेंबर 1985 रोजी झाला. त्याने भारताचे तिन्ही क्रिकेट प्रकारात प्रतिनिधित्व केले आहे. तो 2007 टी20 वर्ल्डकप विजेत्या भारतीय संघाचाही भाग होता. त्याने आंतरराष्ट्रीय क्रिकेटमध्ये 80 हून अधिक सामने खेळले असून 120 पेक्षा जास्त विकेट्स घेतल्या आहेत.

करुण नायर -

कर्नाटकचा फलंदाज करुण नायरनेही भारतीय संघाचे वनडे आणि कसोटी प्रकारात भारताचे प्रतिनिधित्व केले आहे. तसेच त्याने 2016 साली इंग्लंडविरुद्ध चेन्नई कसोटीत नाबाद 303 धावांची खेळी केली होती.

त्यावेळी तो भारताकडून त्रिशतक करणारा विरेंद्र सेहवागनंतरचा दुसराच खेळाडू ठरला होता. त्याने भारताकडून 6 कसोटी आणि 2 वनडे सामने खेळले आहेत. त्याचा देखील 6 डिसेंबरला वाढदिवस असतो.

श्रेयस अय्यर -

भारताचा मधल्या फळीतील फलंदाज श्रेयस अय्यरचा जन्म 6 डिसेंबर 1994 रोजी झाला असून तो सध्या भारतीय संघाचा नियमित सदस्य आहे. त्यानेही भारताचे तिन्ही क्रिकेट प्रकारात प्रतिनिधित्व केले आहे.

त्याने आत्तापर्यंत आंतरराष्ट्रीय क्रिकेटमध्ये 3500 पेक्षा अधिक धावा केल्या आहेत. तो कसोटी पदार्पणात एक शतक आणि एक अर्धशतक करणारा पहिला भारतीय फलंदाज देखील आहे.

जसप्रीत बुमराह -

भारताचा प्रमुख वेगवान गोलंदाज जसप्रीत बुमराह देखील 6 डिसेंबर रोजी त्याचा वाढदिवस साजरा करतो. बुमराहने त्याच्या पदार्पणाच्या आधीपासूनच त्याने आपल्या अनोख्या गोलंदाजी शैलीने आपली वेगळी ओळख निर्माण केली होती.

त्यानेही भारताचे तिन्ही क्रिकेट प्रकारात प्रतिनिधित्व करताना 150 हून अधिक सामने खेळले असून 200 पेक्षा जास्त विकेट्स घेतल्या आहेत.

रविंद्र जडेजा -

भारताचा धाकड अष्टपैलू क्रिकेटपटू रविंद्र जडेजाचाही (Ravindra Jadeja) 6 डिसेंबरला वाढदिवस आहे. 2009 साली आंतरराष्ट्रीय पदार्पण केलेल्या जडेजाने भारताकडून 290 हून अधिक सामने खेळले आहेत. तसेच त्याच्या नावावर 5 हजारांपेक्षा अधिक धावा असून 500 पेक्षा जास्त विकेट्स घेतल्या आहेत. तो सध्या भारताचा तिन्ही क्रिकेट प्रकारातील प्रमुख खेळाडूंपैकी एक आहे.