FIFA World Cup 2022: कतारमध्ये सुरू असलेल्या फिफा फुटबॉल वर्ल्डकप 2022 स्पर्धेतील उपांत्य फेरीला आता सुरूवात होणार आहे. आज मध्यरात्री 12.30 वाजता अर्जेंटिना विरुद्ध क्रोएशिया यांच्यात लुसैल स्टेडियमवर पहिला उपांत्य सामना खेळवला जाणार आहे. त्यामुळे या सामन्यात विजय मिळवून अंतिम सामन्यात प्रवेश करण्याचा दोन्ही संघांचा प्रयत्न असेल.

साखळी फेरीत ग्रुप सी मध्ये अव्वल स्थान मिळवलेल्या अर्जेंटिनाने या स्पर्धेत उपउपांत्यपूर्व फेरीत ऑस्ट्रेलियाला 2-1 अशा फरकाने पराभूत केले, तर नेदरलँड्सला उपांत्यपूर्व सामन्यात पेनल्टी शुटआऊटमध्ये मात देत उपांत्य फेरी गाठली.

तसेच क्रोएशियाने साखळी फेरीनंतर ग्रुप एफमध्ये दुसरे स्थान मिळवले होते. त्यांनी उपउपांत्यपूर्व सामन्यात जपानविरुद्ध 1-1 अशा बरोबरीनंतर पेनल्टी शुटआऊटमध्ये विजय मिळवला. तसेच उपांत्यपूर्व सामन्यांत देखील क्रोएशियाने ब्राझीलविरुद्ध पेनल्टी शुटआऊटमध्येच विजय मिळवला होता.

दरम्यान, गतउपविजेते क्रोएशियाची ताकद त्यांचा बचाव आहे. त्यामुळे ते अर्जेंटिनाचे आक्रमण कसे रोखणार हे पाहाणे औत्सुक्याचे असेल. अर्जेंटिनाकडून लिओनेल मेस्सीची कामगिरी महत्त्वाची ठरेल. दरम्यान, मेस्सीसाठी क्रोएशियाचा संघ एखादा खेळाडू अडकवून ठेवण्याची शक्यता कमी आहे. त्याऐवजी ते मेस्सीविरुद्ध मजबूत बचावावर अवलंबून असतील.

क्रोएशियाकडे मोर्सेलो ब्रोझोविक, मतेओ कोवासिक असे चांगला बचाव करणारे खेळाडू आहेत. तसेच या सामन्यात लुका मॉड्रिक विरुद्ध लिओनेल मेस्सी या दोघांमधील लढत पाहाण्यासारखी असेल. हे दोघेही आपापल्या संघांसाठी सर्वात महत्त्वाचे खेळाडू आहेत.

अर्जेंटिनासाठी एंजल डी मारियाची दुखापत आणि दोन यलो कार्डमुळे गोंझालो मोन्टेल आणि मार्कोस अक्यूनावर आलेली बंदी चिंतेचा विषय आहे. मात्र, त्यांच्याकडे संघात चांगले पर्यायी खेळाडू असल्याने त्यांना सामन्यावर फारसा परिणाम न होण्याची आशा असेल. तसेच क्रोएशियाने सलग दोन सामने बरोबरीनंतर पेनल्टी शुटआऊटमध्ये जिंकले असल्याने त्यांची दमछाक अधिक झाली आहे, ही त्यांच्यासाठी चिंतेची गोष्ट असेल.

दरम्यान दोन्ही संघ आत्तापर्यंत 5 वेळा आमने-सामने आले आहेत. त्यात दोन्ही संघांनी प्रत्येकी दोन सामने जिंकले आहेत. तसेच दोन्ही संघांची लय सध्या चांगली आहे. अर्जेंटिनाने गेल्या 41 सामन्यांपैकी केवळ एका सामन्यात पराभव स्विकारला होता. तसेच क्रोएशियाने गेल्या 12 सामन्यांत एकदाच पराभव स्विकारला आहे.

आता अर्जेंटिनाचे लक्ष्य सहाव्यांदा फिफा वर्ल्डकपच्या अंतिम सामन्यात पोहचण्याचे असेल, तर क्रोएशियाचे दुसऱ्यांदा अंतिम सामन्यात पोचहण्यासाठी प्रयत्नशील असेल. या दोन्ही संघातील जो संघ जिंकेल तो अंतिम सामन्यात मोरोक्को विरुद्ध फ्रान्स संघात होणाऱ्या दुसऱ्या उपांत्य सामन्यातील विजयी संघाशी दोन हात करेल. तर पराभूत होणारा संघ तिसऱ्या क्रमांकासाठी सामना खेळेल.