पणजी : एफसी गोवा संघाने शुक्रवारी जीएफए तासा गोवा 20 वर्षांखालील प्रथम विभागीय फुटबॉल स्पर्धेत पंचतारांकित विजयाची नोंद केली. त्यांनी पणजी फुटबॉलर्सचा 5-1 फरकाने धुव्वा उडविला. सामना साल्वादोर द मुंद पंचायत मैदानावर झाला. (FC Goa wins in Tasa Goa football tournament)

एफसी गोवाच्या विजयात जोवियल डायसने दोन, तर रायन मिनेझिस, मेव्हन डायस व डेव्हिस फर्नांडिस यांनी प्रत्येकी एक गोल केला. त्यांनी सर्व गोल उत्तरार्धातील खेळात नोंदविले. पणजी फुटबॉलर्सचा एकमात्र गोल रोहन भोसले याने केला.

सामन्यातील पहिला गोल 51व्या मिनिटास रायन मिनेझिसने डेल्झान पासान्हा याच्या असिस्टवर हेडिंगद्वारे केला. 57व्या मिनिटास मेव्हन डायसने संघाची आघाडी वाढविली. दोन सामन्यांतील त्याचा हा चौथा गोल ठरला. 68व्या मिनिटास जोवियल डायसने रिबाऊंडवर अचूक नेम साधला. पणजी फुटबॉलर्सने 73व्या मिनिटास पिछाडी कमी केल्यानंतर जोवियलने आणखी एक गोल नोंदवून एफसी गोवाची आघाडी 4-1 अशी भक्कम केली. सामन्याच्या भरपाई वेळेत डेव्हिस फर्नांडिसने संघाच्या मोठ्या विजयावर शिक्कामोर्तब केले.

एफसी गोवाने स्पर्धेतील दोन सामन्यांत तब्बल नऊ गोल केले असून फक्त एक गोल स्वीकारला आहे. त्यांचा पुढील सामना चर्चिल ब्रदर्सविरुद्ध होईल.