FC Goa : ड्युरँड कप फुटबॉल स्पर्धेतील गतविजेत्या एफसी गोवा संघाची मोहीम कोलकाता येथे मंगळवारपासून (ता. 16) सुरू होईल. अ गट साखळी फेरीतील त्यांचा पहिला सामना गतउपविजेत्या मोहम्मेडन स्पोर्टिंग क्लबविरुद्ध होईल.

गतवर्षी कोलकाता येथेच एफसी गोवाने मोहम्मेडन स्पोर्टिंग क्लबला एका गोलने हरवून प्रथमच ड्युरँड कप विजेतेपद मिळविले होते. यंदा त्यांचा मुख्य संघ सहभागी होत नसून नवोदितांवर जबाबदारी असेल. डेगी कार्दोझ या संघाचे प्रशिक्षक असून गतमोसमात डेव्हलपमेंट लीगमध्ये खेळलेल्या खेळाडूंना संधी देण्यात आली आहे. मध्यरक्षक लेस्ली रिबेलो संघाचा कर्णधार आहे.

एफसी गोवाचा गटसाखळीतील दुसरा सामना 19 ऑगस्टला इंडियन एअर फोर्सविरुद्ध होईल, नंतर 26 ऑगस्टला जमशेदपूर एफसीविरुद्ध, तर 30 ऑगस्टला बंगळूर एफसीविरुद्ध ते खेळतील. ‘‘गतविजेते या नात्याने स्पर्धेत खेळताना अतिरिक्त दबाव घेणार नाही. करंडक जिंकण्यासाठी पुन्हा प्रयत्न करायचे हेच आमचे मुख्य उद्दिष्ट्य आहे आणि त्यादृष्टीनेच आम्ही तयारी केली आहे. संघाची चांगली बांधणी आहे आणि क्षमता सिद्ध करण्यासाठी खेळाडू उत्सुक आहेत,’’ असे कार्दोझ यांनी कोलकात्यास रवाना होण्यापूर्वी सांगितले होते.