India vs England T20 World Cup: T20 विश्वचषक 2022 च्या दुसऱ्या उपांत्य फेरीत इंग्लंडने भारताचा एकतर्फी सामन्यात 10 गडी राखून पराभव केला. या विजयानंतर इंग्लंड आता फायनलमध्ये पोहोचला आहे. जिथे त्यांचा सामना पाकिस्तानशी होणार आहे, ज्याने पहिल्या उपांत्य फेरीत न्यूझीलंडचा पराभव केला आहे. भारताने प्रथम फलंदाजी करताना हार्दिक पांड्या आणि विराट कोहलीच्या अर्धशतकांच्या जोरावर 168 धावा केल्या. प्रत्युत्तरात इंग्लंडने 24 चेंडू राखून एकही विकेट न गमावता सामना जिंकला.

दरम्यान, नाणेफेक हारल्यानंतर फलंदाजीचा निर्णय घेत टीम इंडियाने इंग्लंडसमोर विजयासाठी 169 धावांचे लक्ष्य ठेवले होते. भारताकडून विराट कोहलीशिवाय हार्दिक पंड्याने अर्धशतक झळकावले. भारतीय संघाला पहिला झटका केएल राहुलच्या रुपाने बसला, तो 5 धावा करुन बाद झाला. यानंतर रोहित शर्मा आणि विराट कोहली यांच्यात दुसऱ्या विकेटसाठी 47 धावांची भागीदारी झाली. रोहित शर्मा 56 धावांवर बाद झाला, ख्रिस जॉर्डनने त्याला 27 धावांवर पॅव्हेलियनचा रस्ता दाखवला.

तसेच, आदिल रशीदने सूर्यकुमार यादवला (Suryakumar Yadav) 14 धावांवर बाद करुन टीम इंडियाला तिसरा धक्का दिला. भारताने 75 धावांवर तिसरी विकेट गमावली. हार्दिक पांड्या आणि विराट कोहली यांनी चौथ्या विकेटसाठी अर्धशतकी भागीदारी केली. कोहली 50 धावा करुन बाद झाला. भारताने 136 धावांवर चौथी विकेट गमावली. हार्दिक पांड्या (Hardik Pandya) शेवटच्या चेंडूवर आऊट झाला, त्याने 33 चेंडूत 4 चौकार आणि 5 षटकारांच्या मदतीने 63 धावा केल्या.

इंग्लंडचा संघ 10 गडी राखून जिंकला

हा सामना जिंकण्यासाठी इंग्लंडला 20 षटकात 169 धावा करायच्या होत्या. दुसरीकडे, इंग्लंडने एकही विकेट न गमावता हे लक्ष्य गाठले. जोस बटलरने नाबाद 80 आणि अॅलेक्स हेल्सने नाबाद 86 धावा केल्या. टी-20 विश्वचषक 2022 चा अंतिम सामना आता इंग्लंड (England) आणि पाकिस्तान यांच्यात होणार आहे.