Goa Professional Football League: गतविजेत्या धेंपो स्पोर्टस क्लबने गोवा प्रोफेशनल लीग फुटबॉल स्पर्धेत रविवारी सलग दुसऱ्या विजयाची नोंद करताना पणजी फुटबॉलर्सवर 1-0 फरकाने मात केली. सामना म्हापसा येथील धुळेर स्टेडियमवर झाला.

सामन्याच्या पूर्वार्धात लक्ष्मणराव राणे याने नोंदविलेल्या गोलमुळे धेंपो क्लबने सलग दुसऱ्या लढतीत पूर्ण तीन गुण प्राप्त केले. अगोदरच्या लढतीत त्यांनी कुठ्ठाळी व्हिलेजर्सला नमविले होते.

गतविजेत्यांचे आता दोन लढतीनंतर सहा गुण झाले आहेत. पणजी फुटबॉलर्सला सलग दुसरा पराभव पत्करावा लागला. पहिल्या फेरीत त्यांना कळंगुट असोसिएशननेही एका गोलने हरविले होते.

निर्णायक गोल सामन्याच्या १६व्या मिनिटास झाला. धेंपो क्लबच्या आर्नोल्ड ऑलिव्हेरा याने शानदार ड्रिबलिंगचे कौशल्य प्रदर्शित करत लक्ष्मणराव याला चेंडू पुरविला. त्याने प्रतिस्पर्धी गोलरक्षकाला चकवा देण्याचे काम चोख बजावले.

स्पर्धेत सोमवारी (ता. ४) स्पोर्टिंग क्लब द गोवा व एफसी गोवा यांच्यात म्हापसा येथील धुळेर स्टेडियमवर सामना होईल.