37व्या राष्ट्रीय क्रीडा स्पर्धेत बॅडमिंटनमधील महिला एकेरीत रविवारी मानांकित खेळाडूंना पराभवाचा धक्के सहन करावे लागले. द्वितीय मानांकित महाराष्ट्राची मालविका बनसोड पराभूत झाली, तर आसामची तृतीय मानांकित अश्मिता चलिहा हिला सामना अर्ध्यावर सोडावा लागला.

स्पर्धा ताळगाव पठारावरील डॉ. श्यामाप्रसाद मुखर्जी इनडोअर स्टेडियमवर सुरू आहे. मालविका हिला गुजरातच्या अदिता राव हिच्याकडून राऊंड ऑफ १६ फेरीत २१-१५, २१-१४ असा पराभव पत्करावा लागला.

आसामच्या सांघिक सुवर्णपदक विजेत्या कामगिरीत महत्त्वपूर्ण कामगिरी बजावलेल्या अश्मिता हिला तेलंगणाच्या एम. मेघना रेड्डी हिच्याविरुद्ध २१-१७, १७-१७ अशी स्थिती असताना जखमी निवृत्त व्हावे लागले.

महिला एकेरीतील अन्य लढतीत अव्वल मानांकित आकर्षी कश्यप हिला गोव्याच्या अनुरा प्रभुदेसाई हिने झुंजविले. सामन्यात आकर्षी १९-२१, २५-२३, १३-७ अशी पुढे असताना अनुरा हिने दुखापतीमुळे सामना सोडून दिला.

महिला एकेरीत अन्य मानांकित खेळाडूंनी आगेकूच राखली. महाराष्ट्राची श्रुती मुंदडा हिने तेलंगणाच्या श्रीयांशी वालिशेट्टी हिच्यावर २१-१७, २१-१७ असा, तर चौथी मानांकित हरियानाची अनुपमा उपाध्याय हिने महाराष्ट्राच्या पूर्वा बर्वे हिला २१-११, २१-१५ असे हरविले.

आसामच्या सांघिक सुवर्णपदक विजेत्या संघातील ईशारानी बरुआ हिनेही महिला एकेरीत पुढील फेरी गाठताना दिल्लीच्या आशी रावत हिला पहिले गेम गमावल्यानंतर १६-२१, २१-१८, २१-६ असे नमविले.

पुरुष एकेरीत माजी राष्ट्रीय विजेता मध्य प्रदेशचा सौरभ वर्मा याने कर्नाटकच्या एम. रघू याच्यावर २१-१६, २२-२० असा चमकदार विजय प्राप्त केला.

अव्वल मानांकित केरळच्या किरण जॉर्ज याला मात्र संघर्ष करावा लागला. आंध्र प्रदेशच्या के. जगदीश याच्याविरुद्ध त्याने २१-११, १९-२१, २१-११ असा विजय मिळविला.

द्वितीय मानांकित कर्नाटकच्या मिथुन मंजुनाथ याने सोपा विजय साकारला. त्याने तमिळनाडूच्या सिद्धांत गुप्ता याला २१-१४, २१-१७ अशा फरकाने पराजित केले.

तृतीय मानांकित दिल्लीच्या कार्तिकेय गुलशनकुमार याने गोव्याच्या करण धावसकर याच्यावर २१-८, २१-७ असा एकतर्फी विजय संपादन केला. चौथ्या मानांकित तेलंगणाच्या एम. तरुण याने महाराष्ट्राच्या वरुण कपूर याला २१-५, २१-६ असे नमविले.