IPL 2023: आयपीएल 2023 पुढील महिन्याच्या 31 तारखेपासून सुरु होत आहे. या लीगच्या 16व्या हंगामाची तयारी जवळपास पूर्ण झाली आहे. त्याचवेळी, आयपीएलच्या महिनाभर आधी चेन्नई सुपर किंग्जच्या चाहत्यांसाठी एक आनंदाची बातमी समोर आली आहे. CSK चा सर्वोत्कृष्ट खेळाडू IPL 2023 मध्ये प्रवेश करण्यासाठी सज्ज झाला आहे.

CSK खेळाडू तंदुरुस्त

गेल्या वर्षी दुखापतींशी झुंज दिल्यानंतर, भारतीय वेगवान गोलंदाज दीपक चहरने (Deepak Chahar) म्हटले आहे की, 'मी पूर्णपणे तंदुरुस्त आहे.' विशेष म्हणजे, तो पुढील महिन्यात सुरु होणाऱ्या आयपीएलमध्ये पुनरागमन करण्यास तयार आहे. चहरला स्ट्रेस फ्रॅक्चर आणि नंतर मांडीच्या दुखापतीतून सावरणे कठीण झाले होते. तो भारताकडून शेवटचा बांगलादेशमधील दुसऱ्या एकदिवसीय सामन्यात खेळला होता, जिथे तो फक्त तीन षटके टाकू शकला होता.

दुसरीकडे, चहर 2022 मध्ये भारतासाठी फक्त 15 सामने खेळू शकला होता. त्यानंतर दुखापतीमुळे तो T20 विश्वचषकातूनही बाहेर पडला होता. आता, चहर आयपीएलसाठी तयारी करत आहे, जिथे तो CSK कडून खेळणार आहे.

चहर काही महिन्यांपासून फिटनेसवर काम करत आहे

चहर म्हणाला की, 'मी माझ्या फिटनेसवर गेल्या दोन-तीन महिन्यांपासून मेहनत घेत आहे, मी पूर्णपणे तंदुरुस्त आहे आणि आयपीएलसाठी चांगली तयारी करत आहे.' तो पुढे म्हणाला की, 'मला दोन मोठ्या दुखापती झाल्या. स्ट्रेस फ्रॅक्चर आणि मांडीला दुखापत झाली.'