David Warner touches Bhuvneshwar Kumar feet: इंडियन प्रीमियर लीग 2023 स्पर्धेत सोमवारी सनरायझर्स हैदराबाद विरुद्ध दिल्ली कॅपिटल्स संघात सामना पार पडला. या सामन्यात दिल्ली कॅपिटल्सने 7 धावांनी विजय मिळवला. या अटीतटीच्या सामन्यानंतर मात्र डेव्हिड वॉर्नर आणि भुवनेश्वर कुमार यांच्यातील एका मैत्रीच्या व्हिडिओने लाखो चाहत्यांची मनं जिंकली आहेत.

खरंतर वॉर्नर दिल्लीचा कर्णधार आहे, तसेच भुवनेश्वर कुमार हैदराबाद संघाचा महत्त्वाचा खेळाडू आहे. पण हे दोघेही अनेकवर्षे हैदराबादकडून एकत्र खेळले होते. त्यामुळे त्यांच्यात चांगली मैत्री आहे. त्यांची ही मैत्री सोमवारी झालेल्या सामन्यादरम्यानही दिसून आली. त्यांचा व्हिडिओ आयपीएलच्या सोशल मीडियावर अकाऊंटवरही शेअर करण्यात आला.

या व्हिडिओत दिसते की या सामन्याला सुरुवात होण्यापूर्वी वॉर्नर आणि भुवनेश्वर भेटले होते. या वेळी वॉर्नर पळत भुवीजवळ गेला आणि थेट त्याच्या पाया पडला. त्यानंतर त्यांनी एकमेकांची घट्ट गळाभेट घेतली. यावेळी त्यांच्याजवळ असलेल्या इशांत शर्माला त्याचे हसू आवरता आले नाही. त्याच्या या मैत्रीच्या व्हिडिओवर चाहत्यांनी अनेक प्रतिक्रिया दिल्या आहेत.

दरम्यान, सामन्याबद्दल सांगायचे झाल्यास या सामन्यात दिल्ली कॅपिटल्सने प्रथम फलंदाजी करताना 20 षटकात 9 बाद 144 धावा केल्या होत्या. दिल्लीकडून मनिष पांडेने 34 आणि अक्षर पटेलने 34 धावांची खेळी केली.

या दोघांव्यतिरिक्त कोणालाही 30 धावांचा टप्पा ओलांडता आला नाही. हैदराबादकडून वॉशिंग्टन सुंदरने सर्वाधिक 3 विकेट्स घेतल्या. तसेच भुवनेश्वर कुमारनेही चांगली गोलंदाजी करताना 4 षटकात केवळ 11 धावा देताना 2 विकेट्स घेतल्या. त्याचबरोबर टी नटराजन याने 1 विकेट घेतली.

त्यानंतर 145 धावांच्या आव्हानाचा पाठलाग करताना हैदराबादने नियमित अंतराने विकेट्स गमावल्या. त्यामुळे हैदराबादला 20 षटकात 6 बाद 137 धावांच करता आल्या. हैदराबादकडून मयंक अगरवालने सर्वाधिक 49 धावांची खेळी केली. तसेच हेन्रिक क्लासेनने 31 धावांची खेळी केली.

दिल्लीकडून एन्रिक नॉर्किया आणि अक्षर पटेल यांनी प्रत्येकी 2 विकेट्स घेतल्या. तसेच कुलदीप यादव आणि इशांत शर्मा यांनी प्रत्येकी 1 विकेट घेतली.