IPL 2023: चूकीला माफी नाही! विराटला 24 लाखांचा दंड, तर RCB संघावरही कारवाई, 'हे' आहे कारण

Virat Kohli and RCB Team fined: रविवारी इंडियन प्रीमियर लीग 2023 स्पर्धेत रॉयल चॅलेंजर्स बेंगलोरने विराट कोहलीच्या नेतृत्वाखाली राजस्थान रॉयल्सविरुद्ध 7 धावांनी विजय मिळवला. पण या विजयानंतर विराट आणि बेंगलोर संघावर आयपीएलच्या आचार संहितेनुसार कारवाई करण्यात आली आहे.

या सामन्यात बेंगलोरने निर्धारित वेळेत त्यांची षटके पूर्ण न केल्याने त्यांना आयपीएलमधील आचार संहितेतील नियमानुसार दंडाच्या कारवाईला सामोरे जावे लागणार आहे.

आयपीएलकडून जाहीर करण्यात आलेल्या प्रसिद्धी पत्रकात माहिती दिली आहे की विराट कोहलीवर षटकांची गती कमी राखल्याबद्दल कर्णधार म्हणून 24 लाख रुपयांचा दंड ठोठावण्यात आला आहे.

तसेच त्या सामन्यात खेळलेल्या बेंगलोरच्या खेळाडूंनाही दंडाच्या कारवाईला सामोरे जावे लागले आहे. त्यांना 6 लाखाचा किंवा सामना शुल्काच्या 25 टक्के, यातील जो कमी असेल तो दंड भरावा लागणार आहे.

महत्त्वाचे म्हणजे या सामन्यात बेंगलोरला षटकांची गती कमी राखल्याबद्दल पेनल्टीलाही सामोरे जावे लागले होते. त्यांना अखेरच्या षटकात केवळ चार क्षेत्ररक्षकच 30 यार्ड सर्कलच्या बाहेर ठेवता आले होते.

बेंगलोरकडून षटकांची गती कमी राखण्याची चूक या हंगामात दुसऱ्यांदा झाली आहे. यापूर्वी लखनऊ सुपर जायंट्सविरुद्ध 10 एप्रिलला झालेल्या सामन्यातही बेंगलोरकडून निर्धारित वेळेत षटके पूर्ण करण्यात आली नव्हती. त्यावेळी बेंगलोरचा नियमित कर्णधार फाफ डू प्लेसिसला 12 लाखांचा दंड झाला होता.

दरम्यान, लक्षात घेण्यासारखी गोष्ट म्हणजे चेन्नई सुपर किंग्सविरुद्धच्या सामन्यात खेळताना फाफ डू प्लेसिसला बरगड्यांजवळ दुखापत झाली आहे. त्यामुळे तो काही दिवसांसाठी क्षेत्ररक्षण करू शकत नसल्याने विराटने पंजाब किंग्स आणि राजस्थान रॉयल्सविरुद्ध बेंगलोरचे नेतृत्व केले आहे. फाफ क्षेत्ररक्षण करत नसला, तरी इम्पॅक्ट प्लेअर सब्स्टीट्यूट म्हणून गेल्या दोन्ही सामन्यात खेळला असून त्याने फलंदाजी करताना अर्धशतकेही केली आहेत.

सध्या बेंगलोर संघ हंगामातील 34 सामन्यांनंतर गुणतालिकेत पाचव्या क्रमांकावर आहेत. त्यांनी या हंगामात 7 पैकी 4 सामने जिंकले आहेत.