CWG 2022: भारतीय बॅडमिंटनपटूंनी शुक्रवारी 22 व्या राष्ट्रकुल क्रीडा स्पर्धेतील पहिल्या सांघिक सामन्यात पाकिस्तानचा 5-0 ने धुव्वा उडवला. बी सुमीथ रेड्डी आणि मचिमंदा पोनप्पा या जोडीने मिश्र दुहेरीच्या सामन्यात मुहम्मद इरफान सईद भाटी आणि गझला सिद्दीकी यांच्यावर 21-9, 21-12 असा एकतर्फी विजय मिळवून या गेम्समध्ये त्यांच्या संघाच्या प्रवासाला सुरुवात केली. किदाम्बी श्रीकांतने पुरुष एकेरीच्या लढतीत मुराद अलीवर 21-7, 21-12 ने सहज विजय मिळवला.

दरम्यान, महिला एकेरीच्या सामन्यातही भारतीय खेळाडूंचे वर्चस्व कायम राहिले. जिथे दोन वेळा ऑलिम्पिक पदक विजेती पीव्ही सिंधूला (PV Sindhu) महिला एकेरीच्या सामन्यात माहूर शहजादला पराभूत करण्यात कोणतीही अडचण आली नाही. सिंधूने 21-7, 21-6 असा शानदार विजय नोंदवला.

तसेच, सात्विक साईराज रंकीरेड्डी आणि चिराग शेट्टी या जोडीने पुढचा सामना 21-12 आणि 21-9 असा जिंकला, तर शेवटच्या सामन्यात ट्रेसा आणि गायत्री जोडीने 21-4, 21-5 असा विजय मिळवून पाकिस्तानचा (Pakistan) धुव्वा उडवला.