Rishi Sunak plays cricket with England Team: इंग्लंड क्रिकेट संघाने ऑस्ट्रेलियात 2022 मध्ये पार पडलेला टी20 वर्ल्डकप नोव्हेंबर 2022 मध्ये जिंकला होता. या वर्ल्डकप विजयाचे सेलिब्रेशन आता इंग्लंडने चार महिन्यांनी पतंप्रधानांच्या अधिकृत निवासस्थानी म्हणजेच 10 डावनिंग स्ट्रिट येथे केले आहे. विशेष म्हणजे यावेळी खुद्द इंग्लंडचे पंतप्रधान ऋषी सुनक यांच्याबरोबर इंग्लंड संघानं क्रिकेटही खेळण्याचा आनंद घेतला.

इंग्लंडचे टी20 विश्वविजेते खेळाडू कर्णधार जोस बटलरसह ऋषी सुनक यांच्या भेटीला गेले होते. यावेळी सर्वांनी जेवणाचा आनंदही घेतला. दरम्यान, यावेळी मुळ भारतीय वंशाचे असलेल्या ऋषी सुनक यांनी इंग्लंड क्रिकेटपटूंबरोबर फलंदाजी आणि गोलंदाजीही केली. या घटनेचा व्हिडिओ सध्याच चांगलाच व्हायरल होत आहे.

ऋषी सुनक क्रिकेट खेळतानाचा व्हिडिओ सरेच्या ट्विटर अकाऊंटवरही शेअर करण्यात आला आहे. या व्हिडिओमध्ये दिसते की इंग्लंडचे खेळाडू फॉर्मल वेशात म्हणजेच सुटाबुटात आहेत. तसेच सुनक यांनीही फॉर्मल शर्ट-पँट आणि टाय परिधान केलेला आहे. याच फॉर्मल वेशात सर्व क्रिकेट खेळत आहेत.

सुनक यांनी ख्रिस जॉर्डन आणि सॅम करन यांच्या गोलंदाजीचा सामना केला. यावेळी सॅम करन जो मुळात वेगवान गोलंदाज आहे. त्याने सुनक यांच्याविरुद्ध फिरकी गोलंदाजी केली. त्याने टाकलेला चेंडू सुनक यांनी सोडला.

त्यानंतर ख्रिस जॉर्डनच्या चेंडूने मात्र सुनक यांची विकेट घेतली. जॉर्डनने टाकलेल्या चेंडूने सुनक यांच्या बॅटची कड घेतली. त्यामुळे ते स्लीपमध्ये झेलबाद झाले. त्यावर जॉर्डनने सेलिब्रेशनही केले. यानंतर सुनक हे गोलंदाजीही करताना दिसले. या व्हिडिओवर सोशल मीडिया युजर्सने अनेक कमेंट्स केल्या आहेत. तसेच अनेकांच्या पसंतीसह हा व्हिडिओ उतरत आहे.

दरम्यान, 10 डावनिंग स्ट्रिट येथे पंतप्रधान ऋषी सुनक यांची भेट घेतल्यानंतरचे फोटो इंग्लंडचा कर्णधार जोस बटलरनेही शेअर केले आहेत. या फोटोंमध्ये इंग्लंडच्या विश्वविजेत्या संघातील सॅम करन, ख्रिस जॉर्डन, लिआम लिव्हिंगस्टोन, डेव्हिड मलान, फिल सॉल्ट, ख्रिस वोक्स आणि रिचर्ड ग्लिसन आणि टायमल मिल्स हे खेळाडूही दिसत आहेत.

इंग्लंडने गेल्यावर्षी टी20 वर्ल्डकपच्या अंतिम सामन्यात जोस बटलरच्या नेतृत्वाखाली पाकिस्तानविरुद्ध 5 विकेट्सने विजय मिळवला होता. याबरोबरच दुसऱ्यांदा टी२० वर्ल्डकप जिंकला होता. सध्या इंग्लंड असा एकमेव संघ आहे, जे एकाचवेळी सध्या वनडे आणि टी२० वर्ल्डकप विजेते आहेत. इंग्लंडने 2019 साली झालेला अखेरचा वनडे वर्ल्डकपही जिंकलेला आहे.