Neymar jr signs for Saudi Arabian football club Al Hilal:

ब्राझीलचा स्टार फुटबॉलपटू ज्युनियर नेमारचे नाव युरोपियन फुटबॉलमध्ये नेहमीच गाजले आहे. पण आता तो सौदी अरेबियामध्ये त्याचा जलवा दाखवण्यास सज्ज आहे. नेमारने सौदी अरेबियामधील अल हिलाल क्लबबरोबर करार केला आहे. याबद्दल अल हिलालने अधिकृत माहिती दिली आहे.

त्यामुळे नेमारचा आता फ्रान्समधील प्रसिद्ध क्लब पॅरिस सेंट-जर्मेनसोबतचा प्रवास संपला असल्याचे स्पष्ट झाले आहे. सध्या सौदी अरेबियामधील फुटबॉलकडे अनेक मोठे फुटबॉलपटू वळल्याचे दिसले आहे. त्याच आता रोनाल्डोचाही समावेश आहे.

दरम्यान, अल हिलाल क्लबने नेमारबरोबर किती रुपयांचा करार केला असल्याचे उघड केलेले नाही. मात्र, अनेक रिपोर्ट्सनुसार 90 मिनियन युरोपेक्षा अधिकचा (साधारण 800 कोटी रुपयांहून अधिक) करार झाला आहे. तसेच हा २ वर्षांचा करार आहे.

या कराराबद्दल नेमार म्हणाला, 'मी युरोपमध्ये खूप यश मिळवले आणि आनंद घेतला. पण मला नेहमीच जागतिक खेळाडू व्हायचे होते आणि मला नवनवीन ठिकाणी नवी आव्हानासमोर आणि संधींसमोर स्वत:ला तपासायचे होते.' तसेच त्याने सौदी प्रो लीगमध्ये खेळण्याबद्दल उत्सुक असल्याचेही सांगितले.

31 वर्षीय नेमार गेल्या अनेक वर्षांपासून युरोपियन फुटबॉलमध्ये खेळत होता. त्याने बार्सिलोना क्लब आणि पॅरिस सेंट-जर्मेन संघाचे प्रतिनिधित्व केले आहे. 2017 मध्ये त्याने बार्सिलोना संघाची साथ सोडत पॅरिस सेंट-जर्मेन क्लबमध्ये सामील झाला होता. त्यावेळी त्याच्यासाठी 222 मिलियनचा विक्रमी करार झाला होता.

पॅरिस सेंट-जर्मेनसाठी त्याने 173 सामन्यात 118 गोल केले आणि 5 लीग विजेतीपदेही मिळवली. आता तो सौदीमधील क्लबमध्ये सामील झाला आहे.

यापूर्वी गेल्यावर्षी पोर्तुगालचा स्टार फुटबॉलपटू ख्रिस्तियानो रोनाल्डोने सौदी अरेबियातील अल-नासर क्लबबरोबर करार केला होता, ज्याची मोठी चर्चा झाली होती. नुकतीच त्याने अल नासर संघाकडून शनिवारी अरब क्लब चॅम्पियन्स कप 2023 स्पर्धेचे विजेतेपद मिळवले.