Indian Super League Football: इंडियन सुपर लीग (आयएसएल) फुटबॉल स्पर्धेत सलग दहावा विजय नोंदवत बंगळूर एफसीने मंगळवारी एक पाऊल अंतिम फेरीत टाकले. उपांत्य फेरीतील पहिल्या टप्प्यात त्यांनी लीग शिल्ड विजेत्या मुंबई सिटीविरुद्ध 1-0 फरकाने विजय मिळविला.

मुंबई येथे झालेल्या उपांत्य फेरीतील पहिल्या टप्प्यात सुनील छेत्री याने 78 व्या मिनिटास साधलेले हेडिंग अचूक आणि निर्णायक ठरले. त्याने सलग दुसऱ्या लढतीत गोल केला. केरळा ब्लास्टर्सविरुद्ध नॉकआऊट लढतीत त्याचा अतिरिक्त वेळेत फ्रीकिक गोल महत्त्वपूर्ण ठरला होता. छेत्री 58 व्या मिनिटास बदली खेळाडू या नात्याने मैदानात उतरला होता.

आयएसएल उपांत्य फेरीतील दुसऱ्या टप्प्यातील सामना येत्या रविवारी (ता. 12) बंगळूर येथे होईल. तेव्हा अंतिम फेरी गाठण्यासाठी त्यांना बरोबरी पुरेशी ठरेल. बंगळूरने मुंबई सिटीला साखळी फेरीतील परतीच्या लढतीतही हरविले होते.

ओळीने 18 सामने अपराजित राहिल्यानंतर मुंबईतील संघाचा हा सलग तिसरा पराभव ठरला. अंतिम फेरी गाठण्यासाठी त्यांना पुढील सामना दोन गोलच्या फरकाने जिंकावाच लागेल.