Axar Patel Marriage: भारताचा अष्टपैलू क्रिकेटपटू अक्षर पटेल गुरुवारी (26 जानेवारी) लग्नबंधनात अडकला. त्याने त्याची दीर्घकाळची गर्लफ्रेंड मेहा पटेलबरोबर लग्न केले. त्यांच्या लग्नातील अनेक फोटो आणि व्हिडिओ सध्या व्हायरल होत आहेत. दरम्यान, त्यांच्या संगीत सोहळ्यातील एका व्हिडिओने सर्वांचे लक्ष वेधले आहे.

अक्षर आणि मेहा यांनी कुटुंबिय आणि मित्रपरिवाराच्या उपस्थितीत गुजरातमधील वडोदरा शहरात लग्नगाठ बांधली. त्यांचा हा लग्नसोहळा 3-4 दिवस सुरु होता. या सोहळ्यातील अक्षर आणि मेहा यांचा डान्स व्हिडिओ सध्या मोठ्या प्रमाणात व्हायरल होत आहे.

यामध्ये अक्षर आणि मेहा हे 'मान मेरी जान' या गाण्यावर डान्स करत आहेत. डान्स करत असताना अक्षर फलंदाजी करण्याची आणि कॅच घेण्याची मुव्हज देखील करतो. त्यांच्या या डान्सच्या व्हिडिओवर चाहत्यांनी विविध प्रतिक्रियाही दिल्या आहेत.

याशिवाय अक्षर आणि मेहा यांच्या सप्तपदी घेताना आणि वरमाळा घालतानाचे व्हिडिओही व्हायरल झाले आहेत.

या दोघांच्या लग्नसोहळ्यात भारताचा वेगवान गोलंदाज जयदेव उनाडकट त्याची पत्नी रिन्नीसह उपस्थितीत होता. तसेच भारताचा माजी क्रिकेटपटू मोहम्मद कैफ देखील मेहा आणि अक्षरला शुभेच्छा देण्यासाठी लग्नसोहळ्यात सहभागी झाला होता.

(Axar Patel dance with fiancé during his wedding ceremony)

गेल्यावर्षी केलेला साखरपूडा

अक्षर आणि मेहा यांनी गेल्यावर्षी 20 जानेवारी 2022 रोजी साखरपुडा केला होता. विशेष म्हणजे त्याचदिवशी अक्षरचा 28 वा वाढदिवसही होता. त्याने वाढदिवसाच्या दिवशीच मेहाला लग्नाची मागणी घालत साखरपुडा केला होता. त्यानंतर आता एक वर्षाने हे दोघे लग्नबंधनात अडकले आहेत.

दरम्यान, मेहा ही पेशाने डायटिशियन आहे. अक्षर आणि ती गेल्या काही वर्षांपासून एकमेकांना डेट करत होते.

अक्षरने घेतला ब्रेक

सध्या भारतीय संघ न्यूझीलंडविरुद्ध मर्यादीत षटकांच्या मालिका खेळत आहे. पण या मालिकेतून अक्षरने माघार घेतली होती. यामागे कौटुंबिक कारण सांगण्यात आले होते. पण आता अक्षरने लग्नासाठी न्यूझीलंडविरुद्धच्या मालिकांमधून माघार घेतली असल्याचे स्पष्ट झाले आहे. आता अक्षर फेब्रुवारीमध्ये ऑस्ट्रेलियाविरुद्ध सुरू होणाऱ्या कसोटी मालिकेत दिसणार आहे.