इंडियन प्रीमियर लीग 2022 (IPL 2022) च्या प्लेऑफमधून बाहेर पडलेला मुंबई इंडियन्स संघ आता नवीन खेळाडूंना संधी देत ​​आहे. मंगळवारी सनरायझर्स हैदराबाद विरुद्धच्या सामन्यात अर्जुन तेंडुलकरला संधि मिळेल अशी चाहत्यांना अपेक्षा होती. मात्र, अर्जुनचा संघात समावेश करण्यात आला नाही. (Arjun Tendulkar to debut in IPL 2022 against Delhi Capitals)

अर्जुनचे पदार्पण कधी होणार याची चाहत्यांना प्रतीक्षा आहे. याबाबत कर्णधार रोहित शर्माने आता एक मोठे संकेत दिले आहेत. तो म्हणाला, आम्ही सतत नवीन खेळाडूंना संधी देत ​​आहोत. याचा फायदा आम्हाला पुढील मोसमात होईल. यामुळे अर्जुन तेंडुलकर दिल्ली कॅपिटल्सविरुद्धच्या सामन्यात पदार्पण करू शकतो, अशी शक्यता वर्तवली जात आहे.

रोहित म्हणाला, या सामन्यात मयंक मार्कंडेय आणि संजय यादव यांना खेळवण्यात येणार आहे. तर शेवटच्या सामन्यातही काही नवीन खेळाडूंना संधी दिली जाणार आहे. मुंबई इंडियन्सला या मोसमातील शेवटचा सामना 21 मे रोजी दिल्ली कॅपिटल्सविरुद्ध खेळायचा आहे. रोहित शर्माच्या या वक्तव्यानंतर अर्जुन तेंडुलकर ट्विटरवर ट्रेंड करू लागला. दिल्ली कॅपिटल्सविरुद्ध अर्जुन तेंडुलकरचे पदार्पण निश्चित असल्याचा अंदाज ट्विटर वापरकर्त्यांनी वर्तवला आहे.

अर्जुन तेंडुलकरला मुंबई इंडियन्सने 30 लाख रुपयांना घेतले होते. गेल्या मोसमातही अर्जुन तेंडुलकरला 20 लाख रुपयांना विकत घेतले होते, पण त्याला एकही सामना खेळायला मिळाला नाही. या हंगामातही आतापर्यंत तेच घडले आहे.