पंजाबला हरवून दिल्लीची प्लेऑफमध्ये धडक

इंडियन प्रीमियर लीगच्या (IPL 2022) 15 व्या हंगामात जवळपास सर्व संघांनी 12 किंवा त्याहून अधिक सामने खेळलेले आहेत. 10 संघांमध्ये ट्रॉफी मिळविण्याची लढाई आता हळूहळू अधिक रोमांचक होताना दिसत आहे. आता टॉप फोरचे चित्र थोडेसे स्पष्ट होताना दिसून येत आहे. गुजरात (Gujarat Titan), लखनौ आणि राजस्थानचे संघ अव्वल 4 मध्ये कायम राहणार आहेत. (Delhi beat Punjab in the playoffs)

गुजरात संघ 20 गुणांसह गुणतालिकेत अव्वल स्थानावरती आहे. गुजरात या मोसमात प्लेऑफमध्ये पोहोचणारा पहिला संघ ठरला आहे. दुसऱ्या क्रमांकावर राजस्थानचा संघ 16 गुणांसह आहे तर नेट रनरेटच्या आधारे लखनौचा संघ तिसऱ्या क्रमांकावरती घसरला आहे. दिल्लीने पंजाबवर 17 धावांनी मात करून प्रथमच पहिल्या चारमध्ये प्रवेश करून प्ले-ऑफच्या आपल्या आशा पक्क्या केल्या आहेत.

पाचव्या क्रमांकावर रॉयल चॅलेंजर्स बंगळुरूचा संघ आहे, ज्याचे सध्या 14 गुण आहेत आणि आणखी एक सामना खेळायचा आहे. त्याला या सामन्यात मोठ्या विजयाची गरज दिसून येत आहे. सहाव्या क्रमांकावर कोलकाताचा संघ आहे, जो प्लेऑफच्या शर्यतीतून जवळपास बाहेर आहे, सध्या त्यांचे 12 गुण आहेत तर सलग दोन पराभवानंतर पंजाबचा संघ 7व्या क्रमांकावर घसरला. सध्या 13 सामन्यांत संघाचे 12 गुण आहेत.

सलग 5 पराभव पत्करून सनरायझर्स हैदराबाद संघ 8व्या क्रमांकावरती घसरला आहे. मुंबईविरुद्धचा पराभव त्यांना प्लेऑफच्या शर्यतीतून बाहेर काढू शकतो असेही दिसून येत आहे. चेन्नई आणि मुंबईचे संघ अनुक्रमे 9 आणि 10 व्या क्रमांकावरती आहेत. चेन्नई 13 सामन्यांत 4 विजयांसह 8 गुणांसह 9व्या तर मुंबईचा संघ 12 सामन्यांतून 6 गुणांसह 10व्या क्रमांकावरती आहे. चेन्नई आणि मुंबईचे संघ प्लेऑफमध्ये नसण्याची ही पहिलीच वेळ आहे.