पणजी : राष्ट्रीय वेटलिफ्टिंगमध्ये पदक जिंकणारी पहिली गोमंतकीय महिला हा ऐतिहासिक मान गोव्याच्या अर्चिता शिरोडकर हिने शनिवारी मिळविला. तिेने ओडिशातील भुवनेश्वर येथे सुरू असलेल्या राष्ट्रीय वेटलिफ्टिंग स्पर्धेतील युवा गटात ब्राँझपदकाची कमाई केली.

अर्चिताने युवा महिला गटातील 64 किलो वजनगटात स्नॅचमध्ये 64 व क्लीन अँड जर्कमध्ये 84 असे एकूण 148 किलो वजन उचलले. पुदुचेरीच्या सी. हर्षिता हिने एकूण 165 किलो वजन उचलून सुवर्ण, तर उत्तर प्रदेशच्या सुषमा देवी हिने 154 किलो वजन उचलून रौप्यपदकाची कमाई केली.

अर्चिताने गेल्या वर्षी नोव्हेंबरमध्ये झालेल्या अखिल भारतीय पातलीवरील बेंच प्रेस स्पर्धेत सबज्युनियर गटात दोन सुवर्णपदके जिंकली होती. पॉवरलिफ्टिंग व वेटलिफ्टिंगमध्ये अर्चिता गोव्याची (Goa) सर्वोत्तम खेळाडू असून दोन्ही प्रकारात तिने राज्यातील स्ट्राँगेस्ट वूमन हा किताब पटकाविला आहे. राष्ट्रीय वेटलिफ्टिंगमध्ये सोळा वर्षीय अर्चिता दुसऱ्यांदाच सहभागी झाली.

अर्चिताने राज्याचे मुख्यमंत्री डॉ. प्रमोद सावंत (Pramod Sawant), गोवा वेटलिफ्टिंग असोसिएशनचे जयेश नाईक यांचे आभार मानले असून आई-वडीलांना राष्ट्रीय पदकाचे श्रेय दिले आहे.