भारत आणि न्यूझीलंड यांच्यातील पहिल्या वनडे सामन्यात टीम इंडियाने पाच विकेट्सने विजय मिळवत मालिकेत विजयी सुरुवात केली. मात्र, या सामन्यात भारतीय संघाच्या प्लेइंग-11 मध्ये अनुभवी वेगवान गोलंदाज मोहम्मद सिराजला स्थान मिळाले नाही. सिराज भारतीय संघाचा भाग असूनही त्याला मैदानात उतरण्याची संधी देण्यात आली नाही. त्याऐवजी अंशुल कंबोज, गुरनूर बरार, आकिब नबी आणि अर्शदीप सिंह या वेगवान गोलंदाजांना संधी देण्यात आली. सिराजला बाहेर ठेवल्यामुळे चाहत्यांनी सोशल मीडियावर नाराजी व्यक्त केली. आता भारताचा माजी क्रिकेटपटू आणि समालोचक आकाश चोप्रानेही या निर्णयावर प्रश्नचिन्ह उपस्थित केले आहे. सिराजसारख्या अनुभवी गोलंदाजाला सातत्याने संधी का मिळत नाही, असा सवाल त्याने उपस्थित केला आहे.

'सिराज काही नवखा गोलंदाज नाही'; आकाश चोप्राने व्यक्त केली नाराजी

आकाश चोप्राने आपल्या यूट्यूब चॅनेलवर भारताच्या संघ निवडीवर भाष्य करताना मोहम्मद सिराजच्या अनुपस्थितीचा मुद्दा उपस्थित केला. सिराज हा आंतरराष्ट्रीय क्रिकेटमध्ये स्वतःला सिद्ध केलेला गोलंदाज असून त्याला नवखा खेळाडू समजून चालणार नाही, असे त्याने स्पष्ट केले.

आकाश चोप्रा म्हणाला की, मोहम्मद सिराजसोबत नेमके काय सुरू आहे, याचे उत्तर भारतीय संघ व्यवस्थापनाने द्यायला हवे. तो काही नवखा वेगवान गोलंदाज नाही किंवा केवळ संघात जागा भरण्यासाठी असलेला खेळाडू नाही. तो अनेक वर्षांपासून आंतरराष्ट्रीय क्रिकेट खेळत आहे. मात्र, गेल्या 35 महिन्यांत त्याला केवळ 10 वनडे सामने खेळण्याची संधी मिळाली आहे. तर मागील 24 महिन्यांत त्याच्या वाट्याला फक्त सात वनडे सामने आले आहेत. एका अनुभवी गोलंदाजासाठी ही संधींची संख्या कमी असल्याचे आकाशने आपल्या वक्तव्यातून अधोरेखित केले.

रोहित शर्माच्या जुन्या विधानाचाही केला उल्लेख

आकाश चोप्राने यावेळी रोहित शर्माच्या एका जुन्या विधानाची आठवण करून दिली. रोहित शर्मा भारतीय संघाचा कर्णधार असताना एका पत्रकार परिषदेत त्याने मोहम्मद सिराजच्या गोलंदाजीबाबत भाष्य केले होते. जुन्या चेंडूने गोलंदाजी करताना सिराज तितका प्रभावी ठरत नसल्याचे रोहितने म्हटले होते. आकाशच्या मते, या विधानाचा सिराजच्या संघातील स्थानावर परिणाम झाला असण्याची शक्यता आहे.

भारतीय संघाने पहिल्या वनडे सामन्यात चार वेगवान गोलंदाजांसह मैदानात उतरण्याचा निर्णय घेतला. विशेष म्हणजे, जसप्रीत बुमराह आणि प्रसिद्ध कृष्णा हे गोलंदाजही या सामन्यासाठी उपलब्ध नव्हते. असे असतानाही सिराजला प्लेइंग-11 मध्ये स्थान मिळाले नाही. त्यामुळे भारतीय संघाच्या वेगवान गोलंदाजीच्या पर्यायांमध्ये सिराजची घसरण झाली आहे का, असा प्रश्न आकाश चोप्राने उपस्थित केला.

वर्ल्ड कप 2023 नंतर सिराजला किती वनडे सामने खेळण्याची संधी?

मोहम्मद सिराजच्या वनडे कारकिर्दीकडे पाहिल्यास 2023 च्या वनडे वर्ल्ड कपनंतर त्याला सातत्याने खेळण्याची संधी मिळालेली नाही. वर्ल्ड कप फायनलनंतर त्याने केवळ 10 वनडे सामने खेळले असून त्यामध्ये त्याच्या नावावर नऊ विकेट्स आहेत.

ऑगस्ट 2024 मध्ये श्रीलंकेविरुद्धच्या वनडे मालिकेत सिराजने तीन सामने खेळले होते. त्यानंतर ऑस्ट्रेलियाविरुद्धच्या मालिकेतही त्याला तीन सामन्यांमध्ये संधी मिळाली. पुढे जानेवारी 2026 मध्ये न्यूझीलंडविरुद्धच्या मालिकेत तो तीन वनडे सामने खेळला. त्यानंतर वेस्ट इंडिजविरुद्ध न्यू चंदीगड येथे झालेल्या सामन्यातही तो मैदानात उतरला होता. मात्र, त्यानंतरच्या संघ निवडीमध्ये त्याला पुन्हा बाहेर बसावे लागले.

दुसऱ्या वनडेत सिराजला मिळणार संधी?

पहिल्या वनडे सामन्यात न्यूझीलंडविरुद्ध आकिब नबीने गोलंदाजी केली. त्याने चांगली गोलंदाजी करण्याचा प्रयत्न केला, मात्र त्याला एकही विकेट मिळवता आली नाही. त्यामुळे आगामी सामन्यासाठी भारतीय संघ व्यवस्थापन गोलंदाजांमध्ये बदल करण्याचा विचार करू शकते. अशा परिस्थितीत आकिब नबीच्या जागी मोहम्मद सिराजला संधी मिळण्याची शक्यता व्यक्त केली जात आहे.

मात्र, अंतिम प्लेइंग-11 बाबतचा निर्णय संघ व्यवस्थापनच घेणार आहे. पहिल्या सामन्यात विजय मिळवल्यानंतर भारतीय संघ मालिकेतील आघाडी कायम ठेवण्याच्या प्रयत्नात असेल. त्याचवेळी सिराजला दुसऱ्या वनडेत संधी मिळणार का, याकडे क्रिकेट चाहत्यांचे लक्ष लागले आहे.