AFC Asian Cup 2023: सुनील छेत्रीच्या नेतृत्वाखालील भारतीय फुटबॉल संघाला कतार येथे झालेल्या AFC आशियाई चषक 2023 च्या गट ब मधील दुसऱ्या सामन्यात उझबेकिस्तानविरुद्ध 0-3 अशा फरकाने पराभव पत्करावा लागला. भारतीय संघाचा हा सलग दुसरा पराभव आहे. यापूर्वी भारताला ऑस्ट्रेलियाविरुद्ध 0-2 अशा फरकाने पराभव पत्करावा लागला होता. भारतीय संघाला या स्पर्धेत आतापर्यंत एकही गोल करता आलेला नाही, तर त्याविरुद्ध पाच गोल झाले आहेत.

पहिल्या हाफमध्येच भारत तीन गोलने मागे पडला

दरम्यान, ऑस्ट्रेलियाविरुद्धच्या सामन्याच्या पूर्वार्धात चमकदार कामगिरी करणाऱ्या भारतीय संघाची उझबेकिस्तानविरुद्ध पहिल्या हाफमध्येच स्थिती बिघडली. सामन्याच्या चौथ्या मिनिटाला उझबेकिस्तानच्या अबोसबेक फैझुल्लाएवने गोल करुन उझबेकिस्तानला 1-0 अशी आघाडी मिळवून दिली. यानंतर इगोर सर्गेव्हने 18व्या मिनिटाला दुसरा गोल करत संघाची आघाडी दुप्पट केली. विशेष म्हणजे, उझबेकिस्तानने पहिला हाफ संपण्यापूर्वी इंज्युरी टाइममध्ये तिसरा गोल केला. यावेळी नसरुल्लेवने हा गोल केला.

सेकंड हाफमध्ये एकही गोल झाला नाही

सामन्याच्या पहिल्या हाफमध्ये 0-3 ने पिछाडीवर पडल्यानंतर दुसऱ्या हाफमध्ये भारतीय संघाने गोल करण्याचा आटोकाट प्रयत्न केला मात्र विजयाचा आत्मविश्वास असलेल्या उझबेकिस्तानच्या खेळाडूंनी गोल करु दिला नाही. अखेरीस उझबेकिस्तानने हा सामना 3-0 अशा फरकाने जिंकला.

आता शेवटच्या सामन्यात सीरियाशी सामना होणार आहे

भारतीय संघाचा तिसरा आणि शेवटचा सामना सीरियासोबत होणार आहे. या सामन्यात भारतीय संघ प्रतिस्पर्धी संघाला काहीशी टक्कर देताना दिसू शकतो. हा सामना 23 जानेवारी 2024 रोजी सायंकाळी 5 वाजल्यापासून खेळवला जाईल.