37th National Sports Competition: गोव्यात होणाऱ्या 37व्या राष्ट्रीय क्रीडा स्पर्धेचे उदघाटन 25 ऑक्टोबरला नियोजित आहे, मात्र त्यापूर्वी काही खेळांचे आयोजन करण्याचे स्पर्धा तांत्रिक आचार समितीने (जीटीसीसी) ठरविले आहे. यासंदर्भात संबंधित खेळांच्या राष्ट्रीय महासंघांना जीटीसीसी अध्यक्ष अमिताभ शर्मा यांनी लेखी कळविले आहे.
पंतप्रधान नरेंद्र मोदी यांच्या हस्ते ३७व्या राष्ट्रीय क्रीडा स्पर्धेचे उदघाटन केले जाईल, अशी माहिती गोव्याचे मुख्यमंत्री डॉ. प्रमोद सावंत यांनी जाहीर केलेले आहे.
उदघाटनाची तारीख २५ की २६ ऑक्टोबर हे पंतप्रधानांचे कार्यालय निश्चित करणार असल्याचीही माहिती त्यांनी यापूर्वी दिलेली आहे.
स्पर्धेचा समारोप नऊ नोव्हेंबरला होईल. गोव्यातील राष्ट्रीय क्रीडा स्पर्धेत एकूण ४३ खेळांचा समावेश असून स्पर्धेच्या इतिहासातील हा उच्चांक आहे.
जीटीसीसी अध्यक्ष अमिताभ शर्मा यांनी भारतीय नेटबॉल महासंघाला गतआठवड्यात पाठवलेल्या पत्रानुसार, नेटबॉल स्पर्धा २२ ते २७ ऑक्टोबर या कालावधीत खेळली जाईल.
सहा दिवसीय स्पर्धा कांपाल येथील इनडोअर स्टेडियममध्ये नियोजित आहे. अमिताभ यांच्या पत्रानुसार, नेटबॉल स्पर्धेसाठी पात्र संघ स्पर्धा सुरू होण्याच्या दोन दिवसअगोदर गोव्यात दाखल होतील आणि स्पर्धेतील आव्हान संपुष्टात आल्यानंतर संघ पुढील दिवशी रवाना होतील.
दरम्यान, अन्य काही खेळांचे सामनेही राष्ट्रीय स्पर्धेच्या उदघाटनापूर्वी घेण्याचे नियोजन आहे. स्पर्धेचे सविस्तर वेळापत्रक लवकरच आयओए जीटीसीसी यांच्यातर्फे जाहीर केले जाईल.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.