Rakhi Muhurat 2025: भावा-बहिणीच्या अतूट प्रेम आणि विश्वासाचे प्रतीक असलेला रक्षाबंधन हा पवित्र सण यंदा ९ ऑगस्ट २०२५ म्हणजेच शनिवारी साजरा होणार आहे. श्रावण पौर्णिमेला साजरा होणाऱ्या या सणाला भद्राकाळाचे विशेष महत्त्व असते, कारण भद्राकाळात राखी बांधणे अशुभ मानले जाते. मात्र, यंदाच्या रक्षाबंधनाला बहिणींना काळजी करण्याची गरज नाही, कारण या दिवशी भद्राकाळ सकाळीच समाप्त होतोय, त्यामुळे दिवसभर राखी बांधण्यासाठी पुरेसा शुभ मुहूर्त उपलब्ध असेल.

राखी बांधण्याचा शुभ मुहूर्त आणि महत्त्वाचे नियम

यंदा पौर्णिमा तिथी एक दिवस आधी, म्हणजेच ८ ऑगस्ट रोजी दुपारी २:१२ वाजता सुरू होईल आणि ९ ऑगस्ट रोजी दुपारी १:२४ वाजता समाप्त होईल. त्यामुळे, रक्षाबंधनाचा मुख्य दिवस ९ ऑगस्ट असला तरी, राखी बांधण्यासाठी दुपारी १:२४ वाजेपर्यंतच वेळ असेल. यानंतर प्रतिपदा तिथी सुरू होईल, ज्यात राखी बांधणे शुभ मानले जात नाही.

राखी बांधण्याचा शुभ मुहूर्त

रक्षाबंधन: शनिवार, ९ ऑगस्ट २०२५

पौर्णिमा तिथी प्रारंभ: ८ ऑगस्ट, दुपारी २:१२ वाजता

पौर्णिमा तिथी समाप्त: ९ ऑगस्ट, दुपारी १:२४ वाजता

भद्राकाल प्रारंभ: ८ ऑगस्ट, दुपारी २:१२ वाजता

भद्राकाल समाप्त: ९ ऑगस्ट, सकाळी १:५२ वाजता

राखी बांधण्याचा शुभ वेळ: सकाळी ५:३५ वाजल्यापासून ते दुपारी १:२४ वाजेपर्यंत

भद्राकाळात राखी का बांधू नये?

शास्त्र आणि मुहूर्तशास्त्रानुसार, भद्राकाळ हा अशुभ मानला जातो. त्यामुळे, या काळात बहिणींनी भावाच्या मनगटावर राखी बांधणे टाळावे. सुदैवाने, यंदा रक्षाबंधनाच्या दिवशी भद्राकाळ पहाटेच संपत असल्यामुळे बहिणींना भावाला राखी बांधण्यासाठी सकाळी ५:३५ पासून ते दुपारी १:२४ वाजेपर्यंत पुरेसा वेळ मिळणार आहे. रक्षाबंधन हा केवळ एक सण नसून, तो भाऊ-बहिणींमधील प्रेम, विश्वास आणि दृढ बंध दर्शवतो. या दिवशी विशेष पक्वान्न बनवले जातात आणि भाऊ बहिणीला भेटवस्तू देऊन आपले प्रेम व्यक्त करतो.