भूकंप: रशियाच्या कामचटका द्वीपकल्पात (Kamchatka Peninsula) बुधवारी (30 जुलै) सकाळी 8.8 तीव्रतेचा विनाशकारी भूकंप (Earthquake) झाला. यानंतर लगेचच प्रशांत महासागरात (Pacific Ocean) त्सुनामीच्या (Tsunami) लाटा उसळल्या.

जपानला सर्वाधिक फटका: दरम्यान, या त्सुनामीचा परिणाम रशिया (Russia), अमेरिका (America), न्यूझीलंड (New Zealand) आणि जपान (Japan) यांसारख्या देशांच्या किनारी देशांवर झाला. विशेषतः जपानला या त्सुनामीचा सर्वात जास्त फटका बसला.

लाटा: जपान वेदर एजन्सीने दिलेल्या माहितीनुसार, नेमुरो (Nemuro) येथील होक्काइडोच्या (Hokkaido) पूर्व किनाऱ्यावर 60 सेंटीमीटर (सुमारे 2 फूट) उंचीची त्सुनामीची पहिली लाट पोहोचली. त्यानंतर आता या लाटा प्रशांत किनाऱ्यावरुन होक्काइडोपासून टोकियो खाडीपर्यंत (Tokyo Bay) दक्षिणेकडे वाढत आहेत.

20 लाख लोकांना फटका: त्सुनामीच्या धोक्यामुळे जपानमध्ये सुमारे 20 लाख लोकांना आपली घरे सोडून सुरक्षित ठिकाणी जाण्यास सांगण्यात आले आहे.

सुरक्षित ठिकाण: होक्काइडोपासून दक्षिणेकडील वाकायामा प्रांतापर्यंत (Wakayama Province) जपानच्या अधिकाऱ्यांनी लोकांना घरे रिकामी करुन सुरक्षित स्थळी जाण्यास सांगितले आहे.

फुकुशिमा न्यूक्लिअर प्लांट: त्सुनामीच्या लाटांनी जपानच्या फुकुशिमा न्यूक्लिअर प्लांटपर्यंत (Fukushima Nuclear Plant) धडक दिली. धोक्याची शक्यता लक्षात घेता प्लांटमधील कर्मचाऱ्यांना सुरक्षित ठिकाणी हलवण्यात आले. सध्या प्लांटमध्ये कोणत्याही नुकसानीची माहिती नाही.

मदत कार्य: जपानचे पंतप्रधान शिगेरु इशिबा (Shigeru Ishiba) यांनी सांगितले की, अधिकारी परिस्थितीवर सतत लक्ष ठेवून आहेत. मदत आणि बचाव पथकेही (Relief and Rescue Teams) सतर्क आहेत.

अद्याप जीवीतहानी नाही: इशिबा यांनी नागरिकांना किनारपट्टीपासून दूर राहण्यास आणि उंच ठिकाणी जाण्यास सांगितले आहे. जपानमध्ये त्सुनामीमुळे आतापर्यंत कोणतीही जीवितहानी किंवा मालमत्तेच्या नुकसानीची पुष्टी झालेली नाही, ही दिलासादायक बाब आहे.