देशातील प्रसिद्ध उद्योगपती आणि आशियातील सर्वात श्रीमंत व्यक्ती मुकेश अंबानी आणि त्यांचं कुटुंब कायम कोणत्या ना कोणत्या कारणामुळे चर्चेत असते. आताही एका मोठ्या कारणामुळे चर्चेत आहे.

अनंत-राधिकाच्या लग्नाआधीच्या कार्यक्रमाला सुरुवात झाली आहे.

अंबानी कुटंबाने 2 जुलै रोजी ‘रिलायन्स कॉर्पोरेट पार्क’ येथे 50 वंचित जोडप्यांसाठी सामूहिक विवाह सोहळ्याचे आयोजन केले होते, ज्यामध्ये तब्बल 800 हून अधिक लोकांनी या जोडप्यांना आशिर्वाद देण्यासाठी हजेरी लावली.

या सामूहिक विवाह सोहळ्याला मुकेश अंबानी, नीता अंबानी, आकाश अंबानी, श्लोका अंबानी, ईशा अंबानी आणि आनंद पिरामल यांच्यासह संपूर्ण कुटुंबाने हजेरी लावली. सध्या विवाह सोहळ्याचे फोटो आणि व्हिडीओ सोशल मीडियावर तूफान व्हायरल होत आहेत.

सोशल मीडियावर व्हायरल होत असलेल्या फोटो आणि व्हिडिओमध्ये निता अंबानी आपले पती मुकेश अंबानी यांच्यासोबत मंत्रोच्चार करताना दिसल्या.

पालघर येथील स्वामी विवेकानंद विद्यामंदिर येथे 2 जुलै रोजी सायंकाळी 4.30 वाजता सामूहिक विवाह सोहळा पार पडला. यावेळी अंबानी कुटुंबासह पिरामल कुटुंबाने या जोडप्यांना भेटवस्तू आणि आशिर्वाद दिला.

अंबानी कुटुंबाने यावेळी प्रत्येक जोडप्याला मंगळसूत्र, कानातले, नथ आणि दागीने दिले. एवढचं नाहीतर प्रत्येक जोडप्याला 1 लाख 1 हजाराचा चेकही दिला. याशिवाय, 36 प्रकारच्या जीवनावश्यक वस्तू देण्यात आल्या.

'मानव सेवा हीच ईश्वर सेवा' हा विचार अंबानी कुटुंबाने नेहमीच जपला आहे. विशेष म्हणजे, त्यांच्या कामातूनही याची प्रचिती येते.

विवाह सोहळ्याच्या शाही नियोजनानंतर अंबानी कुटुंबीयांचं सर्व स्तरातून कौतुक होत आहे.