rashifal 2026 in marathi: ज्योतिषशास्त्रानुसार, वर्ष २०२५ हे 'मंगळ' ग्रहाचे वर्ष होते, ज्यामुळे अनेक राशींच्या जीवनात मोठे चढ-उतार आणि अस्थिरता अनुभवायला मिळाली. आता नव्या २०२६ वर्षाच्या प्रारंभाला काहीच दिवस उरले असताना, ग्रहांच्या स्थितीमध्ये मोठे फेरबदल होणार आहेत. या बदलांमुळे १२ राशींपैकी काही भाग्यवान राशींना नशिबाची भक्कम साथ मिळण्याची शक्यता आहे, तर काहींना शनिच्या साडेसातीचा सामना करावा लागू शकतो.

२०२६ मध्ये ग्रहांची प्रमुख स्थिती:

शनि: वर्षभर मीन राशीत विराजमान राहणार.

राहू: मकर राशीत

गुरू (बृहस्पति) आणि केतू: कर्क राशीत

या प्रमुख बदलांमुळे वृषभ, मिथुन, तूळ आणि मकर राशीच्या जातकांसाठी २०२६ हे वर्ष कसे असेल, याचा हा खास आढावा.

१.वृषभ राशी: गुरूच्या कृपेने करिअरमध्ये स्थिरता

वृषभ राशीच्या नोकरदार लोकांसाठी २०२६ हे वर्ष अत्यंत अनुकूल ठरू शकते.

नोकरी/व्यवसाय: वर्षाच्या सुरुवातीपासून जूनपर्यंत कामाच्या ठिकाणी स्थिरता आणि सहकाऱ्यांचे पूर्ण सहकार्य मिळेल. राहुच्या प्रभावामुळे काही गैरसमज निर्माण होऊ शकतात, पण कामावर लक्ष केंद्रित ठेवल्यास वर्षाच्या अखेरपर्यंत वरिष्ठांचा विश्वास आणि चांगले परिणाम मिळतील. व्यवसायात समजून उमजून आणि सावधगिरीने निर्णय घेतल्यास चांगला फायदा होईल.

शिक्षण/आरोग्य: गुरूच्या कृपेमुळे विद्यार्थ्यांची एकाग्रता वाढेल. संशोधन, कायदा आणि पर्यटन क्षेत्रातील विद्यार्थ्यांना विशेष लाभ होईल. आरोग्याच्या दृष्टीने हे वर्ष सरासरीपेक्षा चांगले असून नियमित योग आणि संतुलित दिनचर्या पाळणे महत्त्वाचे आहे.

२. मिथुन राशी: भाग्याची साथ आणि मेहनतीला फळ

मिथुन राशीच्या लोकांसाठी २०२६ हे वर्ष नोकरीच्या दृष्टीने खूपच चांगले असणार आहे.

नोकरी/व्यवसाय: वर्षाच्या सुरुवातीला कर्म भावात गुरू असल्याने कार्यक्षेत्रात नशिबाची पूर्ण साथ मिळेल आणि कामे वेळेत पूर्ण होतील. वरिष्ठ अधिकारी प्रशंसा करतील. २ जून ते ३१ ऑक्टोबर या काळात गुरू उच्च स्थानी असल्याने यशाच्या संधी वाढतील. शिक्षण, फायनान्स आणि व्यवस्थापन क्षेत्रातील लोकांना मोठा फायदा होईल.

आरोग्य/शिक्षण: हे वर्ष विद्यार्थ्यांसाठी अनुकूल असून कठोर परिश्रमाने चांगले परिणाम मिळतील. संशोधन आणि व्यावसायिक अभ्यासक्रमांसाठी काळ चांगला आहे. आरोग्याच्या दृष्टीने हे वर्ष सरासरीपेक्षा थोडे चांगले राहील, पण दिनचर्या नियमित ठेवणे आवश्यक आहे.

३. तूळ राशी: आर्थिक स्थिरता आणि करिअरमध्ये यश

२०२६ हे वर्ष तूळ राशीच्या नोकरदार आणि व्यावसायिकांसाठी अत्यंत अनुकूल असणार आहे.

नोकरी/आर्थिक स्थिती: शनी सहाव्या घरात असल्याने प्रचंड मेहनत घ्यावी लागेल, पण त्या मेहनतीचे फळ सन्मान आणि यश घेऊन येईल. वर्षाच्या सुरुवातीपासून जूनपर्यंत गुरूचा सहयोग भाग्यवृद्धी करेल. आर्थिक दृष्ट्या वर्ष खूप चांगले असून, गुरूच्या कृपेने उत्पन्न आणि बचत दोन्हीत वाढ होईल.

शिक्षण/व्यवसाय: राहूमुळे विद्यार्थ्यांचे लक्ष विचलित होऊ शकते, पण एकाग्रता कायम ठेवल्यास स्पर्धा परीक्षांमध्ये यश मिळेल. व्यवसायात राहुमुळे काही निर्णय चुकण्याची शक्यता आहे, त्यामुळे सावधगिरी बाळगा. वर्षाच्या अखेरीस परिस्थिती सुधारेल आणि लाभाची शक्यता वाढेल. आरोग्याच्या दृष्टीने मोठी समस्या येणार नाही.

४. मकर राशी: करिअरमध्ये स्थिर प्रगती

मकर राशीच्या लोकांना २०२६ मध्ये अनेक क्षेत्रांत लाभाची शक्यता आहे.

नोकरी/व्यवसाय: तिसऱ्या घरात शनी असल्यामुळे मेहनतीला आणि धैर्याला चांगले फळ मिळेल. जून ते ऑक्टोबर या काळात पदोन्नती किंवा कामाच्या ठिकाणी सन्मान वाढण्याची शक्यता आहे. वर्षाच्या अखेरीस गुरुची स्थिती कमजोर असल्याने मोठे धोके घेणे टाळा.

आर्थिक/शिक्षण: आर्थिक स्थिती मिळतीजुळती राहील. उत्पन्नाचे नवे स्रोत निर्माण होतील, पण राहूमुळे अनावश्यक खर्च वाढू शकतो. गुरूच्या कृपेने आर्थिक स्थिती हळूहळू स्थिर होईल. शिक्षणाच्या दृष्टीने जून ते ऑक्टोबर हा काळ अनुकूल राहील.